純官3月正式執掌新世界發展（017）帥印，做嘢即刻都爽手啲。有熟悉新世界的人士形容，感覺到純官係想將新世界中心重建項目，打造成佢嘅代表作。據純官所言，要大家一睇到重建後嘅product，就會「Wow」一聲喎。海迪覺得，喺海傍起一幢61層高嘅龐然巨物，會忍唔住爆出口嘅睇怕會喺其他字囉！
純官原來咁睇重新世界中心，唔怪得一揸旗無耐，就決定要提早收返租俾Sogo嘅地庫，連一向與彤叔份屬老友嘅大、細劉都無面俾，果然係「公私分明」﹗不過，Sogo那個位出名是「死場」，位置偏遠，又獨立得佢一幢，堪稱「做邊個死邊個」。90年代該處是名店城，一度經歷十室九空的恐怖場面，之後就算變「亞瑪遜」、「小熊國」等兒童遊樂場，養大嘴鳥，都係慘淡收場。
純官想將新世界中心打造成「Signatureproduct」，點解決屬死症的人流問題？就算當年新世界同政府合作起條地下隧道，再「貼心地」取消埋梳士巴利道的斑馬線，其成效都係麻麻。睇返K11的成績，海迪唯有衷心希望純官今次趕人走係正確嘅決定吧。
海迪