香港女仔普遍都嗌瘦身，不外乎都係為咗變靚啲，不過中國跳水組合陳若琳同汪皓，瘦身就為咗面金牌；周二呢對中國孖公仔贏咗女子雙人10米台金牌後，就自爆長期節食，陳若琳更加喺近3年都冇食過晚飯。
3年未食過晚飯
19歲嘅陳若琳喺京奧已經攞兩金，都算係隊中嘅大家姐，但中國隊一直要求嚴格，對身高同體重都要有嚴格控制。事關體重越重，落水產生嘅水花就會越大，而且陳若琳同汪皓都要玩雙人賽，唔可以同拍檔體重差距太大，影響同步性。
陳若琳08年京奧後，開始踏入發育年齡，體重一度達到50公斤（110磅）嘅死線，差啲畀中國踢出奧運代表隊，好彩佢嚴格執行節食大計，包括完全唔食零食、雪糕，甚至3年嚟未食過晚飯，每日下午練習完畢返宿舍，為咗抵肚餓，佢嘅節食最佳方法就係大覺瞓；結果若琳以47公斤當弗體重，參加今屆奧運。
佢嘅拍檔汪皓亦都係一直節食，保持最佳體重；好彩今次成功奪金後，身為天津人嘅汪皓，媽媽等佢返到家鄉，準備定天津家鄉餸，等汪皓可以放肆咁食番一餐。
緋聞男友係歌手
之前雙人3米板金牌成員之一何姿，就俾網民摷得大量靚靚生活照，原來陳若琳比較起4年前，都好似由「醜小鴨」變成「天鵝」，佢嘅個人微博都有好多靚女相。而且若琳仲有緋聞男友，係國內歌手劉孟哲；若琳由北京出發時，劉孟哲已經有嚟送機，而翻查劉孟哲嘅個人單曲，仲有一曲歌叫若琳，憑歌寄意咁浪漫，追到金牌選手都唔奇啦！
