【本報訊】老友都無面畀！純官揸旗不足半年的新世界發展（017），為擴大尖沙嘴重建項目，決定逼走尖沙嘴崇光百貨（Sogo），提早於2014年2月全面收回租予崇光的11.5萬呎地庫，崇光一年半後被迫結業。母公司利福（1212）財務總監潘福全亦感無奈：「無辦法，租人地方，最後都係得個搞字！」
記者：吳綺慧、陳健文、程俊華
同樣是鄭裕彤（彤叔）做大股東、但由好友劉鑾鴻負責管理的利福昨日宣佈，由於新世界提前終止合約，故雙方協商後，崇光會分兩階段全面撤走，首先今年12月會先交還750平方呎，用作工程準備；餘下大部份面積則於2014年2月前交還。崇光原本租約期為15年、即2020年才到期。
尖沙嘴崇光開業至今已7年，該址原是行內公認的「死位」，多次轉手經營都未能帶旺人流，直至崇光進駐艱苦營運一段時間，再加上自由行旅客湧港的推助下，才令這場口奇蹟地「起死回生」。尖沙嘴崇光由07年起，每年都有數千萬元盈利貢獻。
「新世界管理層唔同晒」
潘福全表示，由於當年簽合約時，是容許新世界在5年後可提前終止租約，故今次被迫遷，對方不用作任何賠償。他說：「無諗過佢哋會提前收番，因為嗰個位佢哋根本冇乜用。不過正所謂『十年人事幾番新』，好多嘢都唔同咗，新世界管理層都唔同晒啦！」
彤叔今年3月正式交棒，將其王國全部交予愛子鄭家純（純官）打理，純官坐正做新世界主席，更拋出要做地產界「BigOne」的宏願。近年系內亦有不少老臣子離開，高層架構可謂面目全非。
「要開番間Sogo都好難」
對失去尖沙嘴崇光，潘福全坦言可惜，因該店表現正穩步上揚，去年亦有逾9000萬元盈利，「但無辦法，喺香港所有好嘅場都由大孖沙揸住，租位又會被人趕走，最後都係搵嚟搞。我估之後要喺香港開番間Sogo都好難。」
尖沙嘴崇光佔利福去年營業額及盈利分別約8.8%及4.8%，潘福全指有關財務影響要2014年才顯現，但鑑於內地百貨業務比重正不斷加大，故到時尖沙嘴店結業的影響會更小。不過，尖沙嘴崇光當年裝修總投資近1億元，每年原本折舊攤銷約640萬元，如今餘下逾3000萬元的部份，將於今年度起分20個月全部撇賬。利福暫無打算辭退尖沙嘴崇光逾100名員工，會視乎情況把他們轉往銅鑼灣崇光。
有外資分析員表示，利福突然失去一個穩定收入，雖然金額不多，但是「肉酸」，「當內地收入繼續升，應可抵銷今次嘅影響；又唔係即刻收番，都叫俾時間利福做準備，算係咁啦。」
遊客心聲
