成班老友輪流做東，請吃午飯，今次去到上海總會，上海總會有一味鎮會之寶，招牌名菜，就係「火朣翅」，乃創會會長王劍偉幾十年前創下，即係火朣雞煲翅，以上等金華火腿燉雞、翅，味道濃郁，啲翅身又如外滙G所云：「今日食翅粗粗地算嘞！」於是人人食到讚不絕口，前輩賓架N話：「食勻全港，論火朣翅，始終係上海總會第一。」灣仔浙江軒開幕之後，左丁山曾有介紹，好多老友立即入會，有一輪個個走去灣仔浙江軒食上海菜，或者可能係咁，浙江軒嘅生意旺到不得了，日夜爆棚，外滙G平日訂房，講明要八點鐘交房俾下一輪，搞到佢食得擒擒青，最近唔去浙江軒咯。講起嚟，我地班人全部係浙江軒會員，但因太難訂位，近兩個月都未去幫襯過，多數回流中環上海總會。開會所，冇生意會長嗟短嘆，生意太旺又易得失會員，管理人員幾難做㗎。
席間有泰國客人，獲知前泰國總理已在七月廿五日來港（其實係在香港買咗屋，久唔久就嚟住番幾日行下商場），正日會在Mira（美麗華酒店）開生日派對，慶祝六十三歲生辰，百幾人自泰國飛嚟出席，他信叫做係流亡人士，但佢嘅流亡生活多采多姿，與陳光誠嘅流亡美國生涯當然相差好遠。最妙嘅就係有報道話泰國警察總長都嚟埋賀壽，難怪泰國民主黨領袖前總理阿披實慨嘆：「我國警察一哥點解會與海外流亡犯人一齊開Party！」騎騎，香港唔得啫，泰國標準點會與香港相同？
泰國客人話費事惹上閒話，唔敢去賀壽，今餐吃火朣翅仲好過去食酒店生日餐！講到食翅，就有人提起多倫多，加里福尼亞州禁翅如禁白粉，即時引起辯論。原來香港小小城市，係全世界最大最重要嘅魚翅貿易中心，上環西環啲海味舖，魚翅商人對魚翅價錢有巨大影響力。前輩話講道地香港歷史，海味商店商號百餘年來係香港人之真正集體回憶，非甚麼政府合署西座可比。加拿大人猛咁殺海豹，同時話殺鯊取翅係不人道，實乃雙重標準。魚翅係西方（葡西法意英）人捕鯊食肉之副產品，佢地除咗魚翅之外，乜都食晒，用晒。環保人士唔敢鬧西方人食鯊魚肉及用鯊魚皮製品，但敢痛駡華人食魚翅，莫名奇妙！