幾日前仲擔心緊俾查理阿當踩傷嘅加里夫巴利，開季可能未必踢到。點知話咁快就冇事，喺禮拜二對紐約紅牛場熱身賽上陣不特止，仲要有波入協助球隊以2:1反勝。我求大俠真係要寫個服字畀呢位打不死嘅戰士。
剛被鏟傷 神奇正選
呢場波係熱刺美洲之旅最後一戰，對手紅牛有新兵卡希爾首次披甲，仲好快喺8分鐘，博到對方新加盟嘅後衞維頓漢犯規，由堅尼谷巴射入12碼領先。不過，呢球波之後，就完全屬於熱刺嘅天下，其中一路喺熱身賽着9號嘅巴利仔當然最搶眼，喺60分鐘接應角球頭槌追平；5分鐘後，新加盟嘅基菲爾施古臣再入多一粒，最後2:1反勝紅牛，連續和咗銀河同利物浦後，終於攞番個尾彩。
自從巴利仔周日俾阿當踢傷後，教頭波亞斯第一個出嚟話好擔心愛將季初踢唔到，又話要將「兇手」阿當告到英足總嗰邊。後來隊醫雖然證實巴利冇大礙，但大家都認為對紅牛場波，波仔未必會出佢，點知最尾竟正選披甲，仲要踢到鬼咁生猛，做埋贏波功臣。
雖然巴利打不死咁款，但當傳媒問佢原諒咗阿當未，佢就似乎仲未嬲完：「我唔想再講呢條友，佢心知肚明自己做過啲咩，我淨係關心自己嘅狀態，今朝隻腳仲特登敷咗冰。」