「莫道你在選擇人，人亦能選擇你」，已故歌手陳百強嘅金曲《等》真係百聽不厭；話時話，利物浦前鋒安祖卡路爾家嘅處境，同呢首歌都好相似；上季英超入得4粒波，卡路爾都竟然有「英超斑馬」紐卡素同「英超升班馬」韋斯咸爭，兩隻馬畀佢揀，卡路爾就梗係心繫紐卡素。
紅軍新任領隊羅渣士對23歲嘅卡路爾似乎唔太信任，加上又有舊部、意大利前鋒波連尼加盟，新一季唔使佢都夠照；韋斯咸率先出手以200萬鎊借卡路爾一季，今季若留到班，可再以1,700萬鎊（約2億港元）買斷呢位英格蘭射手，講真出價都已經好合理。點知卡路爾似乎都係想返母會紐卡素多啲，所以佢本人已經一口拒絕。
卡路爾揀斑馬唔揀升班馬，除咗紐卡素實力點都好過韋斯咸，今季又有歐霸盃踢外，仲因為自己喺紐卡素大，無論搵屋定夜晚搵蒲點都熟啲：我求大俠心地唔多好，正所謂「做慣乞兒懶做官」，卡路爾上季長期坐利物浦冷板凳，不過又照出高薪，真係為咩搞到自己身水身汗落場。紐卡素上季有「黑雙煞」柏比斯施斯同丹巴巴亞，後備又有艾美奧比兄弟，除非丹巴巴亞真係畀其他球隊挖走，否則卡路爾過到去，都未必有正選打，舒舒服服打吓後備好過。
踢韋咸辛苦好多
相反，韋咸由「大儍」艾拿迪斯領軍，踢法體力化之餘，又要打護級戰，真係場場硬仗，將心比己，卡路爾寧願外借去紐卡素都係人之常情。