真人騷《生還者》裏面，一班型男索女喺熱帶小島鬥智鬥力，爭做死剩種，真係夠晒刺激。不過今次，唔使飛去太平洋島仔，就可一償歷奇心願，撐着玻璃艇，深入西貢鹽田梓，繞過紅樹林、兜過魚排，欣賞埋海底生物，恍如經歷了一次Lite版《生還者》！
被海水包圍
呢艘玻璃艇，全身透明，主要用料是玻璃纖維，外形就如獨木舟一樣，只是座位比較寬闊，可以容納兩人，划艇方法與膠槳無異於獨木舟。西貢鹽田遊樂會負責人Patrick教路：「雙手提着膠槳，梅花間竹地左右划着，膠槳以九十度角插入水裏，就可輕易加速。」說難不難，不過頗花氣力，划得十分鐘都要唞唞。
模特兒Hidy是水上活動愛好者，游水、潛水瓣瓣掂，梗係唔使學，一跳上艇已經可以自動波喇；而驚驚青青的Mia，學了十五分鐘，掌握了要訣，才敢坐上艇，向藍天大海出發。睇到呢度，或者閣下會話：「唓！我去划獨木舟咪一樣！」咪唓住，呢艘玻璃艇精髓所在就是全透明，坐喺裏面，直情係與大海肉帛相見，整個人都被海水包圍着，卻又唔會濕身，艇底更可透視水底世界，有魚有蝦有珊瑚，感覺很是奇妙！
《四大必睇位》
1.紅樹林
在鹽田梓碼頭出發，沿着海岸線，划上十五分鐘左右，就開始睇到一片矮矮的叢林，呢種感覺，又幾似探險！鹽田梓的紅樹林覆蓋整個淺灘，品種繁多。或者你曾經腳踏泥灘在流浮山睇過日落，也可能穿過米埔的浮橋欣賞紅樹林，但循水路走進這片叢林，可謂是嶄新的體驗。
紅樹林生長在鬆軟濕潤的泥灘上，附近石頭佈滿蠔殼，細心觀察，仲會見到不少生物在泥灘上走動！不過記住，潮退時好難划得近，所以最好趁潮漲時出發，否則玻璃艇擱淺，划划吓要落艇推就真係唔型嘞！
2.招潮蟹
潮退時，在泥灘中看到的一個個小洞，原來藏了一隻隻的骰可愛的招潮蟹。雄蟹的一雙螯大小不一，其中一隻特別巨型，而且顏色鮮艷，真係好趣致！除了在泥灘，在淺水地方，也會看到不少細細隻的蟹仔橫行，走得又急又快，真係好似泥灘上的流星，等我許番個願先！
3.海星貝殼
講真，香港海水清澈度真係同泰國、沖繩無得比，加上紅樹林底下是泥灘，沿岸海水自然不夠澄明，但在淺水處一樣看到大小不一的貝殼，運氣好的話，甚至會搵到海星㖭！當然，有愛心的你，記得唔好亂搞人哋，同海星Say吓Hello就算喇！划一陣，唞一唞，放低膠槳，撥吓海水，欣賞吓青山藍天，真係爽！「怪唔之得我划唔郁啦，原來你隻手擋住啲水！」「隻艇側側哋喎，就離翻啦！」如果你掛住玩水，你同艇的朋友可能會有以上呼叫。
4.魚排
紅樹林對出的內灣是雞籠灣，有一列木板、車胎、水桶搭建而成的魚排。西貢碼頭旁的一列海鮮食肆，不少都是在這裏攞魚。這些魚排有些更經營埋休閒垂釣生意，假日不少釣友專誠坐船來㗎。划艇經過這個內灣，順道欣賞埋漁村風情，都咪話唔夠寫意。魚排主人會否歡迎你上去行吓？咁就睇你有無佢兩位靚女咁受歡迎喇！
上岸繼續有得玩
划完艇，未夠喉？不如漫步鹽田梓，這裏是香港陳姓客家村落，有近三百年歷史，九十年代最後一戶遷出後，一直沒有人居住。近年有子孫回村辦文化生態遊、康樂活動，令到荒廢了的村落熱鬧起來。這條村落獨特之處是，村民及子孫大部份都是天主教徒，座落小山坡上的聖若瑟小教堂有過百年歷史。教堂之外，村中的老房子、名人故居、荒廢了的鹽田、天主教墳場等，都是值得一遊的地方。
玻璃獨木舟遊
內容：八人一團，由教練帶隊，1.5小時撐玻璃艇遊紅樹林、魚排及燒烤。
收費：8月周日每位$380，浮潛每位加收$50
查詢：96429603
網址： http://www.ytparadise.hk
交通：從西貢碼頭乘搭街渡（27916226）
