半夜4點睇到接近天光8點，實在不容易捱完整個倫奧開幕式，幸好總舵手DannyBoyle的心思和構想，令3個多小時一下子就過去了，而且因為太興奮也就再沒成眠，決定上網搵片睇，一再細味箇中情節。
開幕式舉行過後，朋友在「面書」集中發表感受，由占士邦、英女皇、女皇寵物歌姬犬，由MrBean到PaulMcCartney，焦點都集中對比4年前的京奧，最好笑的一個意見係：「一個窮國搞的開幕禮！」據報道，京奧開幕不計成本地用咗72億，倫奧則只係用3億，零頭價錢有冇燒鵝味道，就真係連黃興桂都未必敢講得實！
有朋友問，何以麥卡尼爵士千揀萬揀，最後派《HeyJude》上陣？我不假思索就回應：「1，必定要係家傳戶曉的披頭四作品；2，難度不可太高，話晒佢老人家七張嘢，唔通要佢唱《AHardDay'sNight》獻醜咩；3，副歌要容易上口，唔止現場所有人，仲要全世界睇電視直播的觀眾都要識一齊哼lalala...lalala...lalalaheyJude...」
也有朋友認為太多關於電影的元素，但仔細睇，所謂電影都來自文學原著，由莎士比亞到占士邦到哈利波特，若果中國以財力震懾所有人，英國卻以原創作品征服全世界，窮係事實，但勝在有骨氣，沒有窮酸氣！
盧覓雪
多棲藝能人