咁多年嚟，《DOA》系列喺中港台有着「搖乳格鬥」嘅美譽，事關內裏主角個個樣靚身材正！試玩版喺動漫節曝光，令人再次熱切期待第五集嘅來臨，今集仲激到有得換泳衣同喱士內衣，打交之餘仲要換衫鬥Sexy！
記者：陳國輝
性感服裝玩得更激
呢隻Game要到九月底先有得玩，但官方早就多次漏出美女格鬥片段，今屆動漫節更首次畀大家試打，難怪網友流到一地口水！講表現，除咗速度快，還採用慢動作去演繹全新必殺技「PowerBlow」，配合DynamicAttraction技術，令背景建築物因應招式產生嘅撞擊力，造成猛烈破壞，齋睇已經夠逼真！
但更叫人熱血沸騰嘅，肯定係角色變裝系統！單單呢個系統已經係前作《DOA沙灘排球》嘅最大賣點，今集玩得仲激，開胸緊身衣、喱士女皇Look等等，最噴血係初回限定版送嘅服裝，由霞、綾音及瞳穿上嘅小野兔Look，片中幾乎只見嫩滑肌膚兼以毛毛遮蓋三點，簡直引人遐想，無心戀戰！該片更追加三人混戰模式，一個用大髀夾頭，另一人從後施襲，話佢陰濕都好，視覺上已經係一大享受！
《VF》結城晶亂入
每集例牌都加入全新角色，未睇《DOA5》有乜新角，單單另一王牌3D格鬥Game《VirtuaFighter》嘅Crossover，已勁有睇頭！暫時只知結城晶同莎拉會亂入，而晶哥唔只繼續用最擅長嘅八極拳，今集還可作遠距離攻擊，話唔定招牌連續技「崩擊雲身雙虎掌」都可重出江湖！至於莎拉繼續以火烈鳥為基礎長腿攻擊，玩開《VF》嘅機迷更可一改其衣着風格，增添遊戲新鮮感。新增模式方面，《DOA5》也採用《DOA沙灘排球》玩開嘅PhotoMode，等你將戰鬥中出現嘅華麗超必、性感Pose等，影番張靚相留念，再喺PhotoAlbum慢慢睇。
鐵盒珍藏版冧Fans
官方特別推出珍藏版，歐版包含遊戲相集、原聲CD、巨型Poster及全女角虛擬泳衣；日版就多咗Postcard同金屬牌。遊戲採用鐵盒包裝，值得收藏。
《DeadorAlive5》
平台：PS3、Xbox360
類型：格鬥對戰
推出日期：9月27日
