幾個月前過身嘅國際植物學權威胡秀英博士（1949年第一位華裔女性取得哈佛大學植物學博士學位），功在中大，在研究冬青、萱草、人參、菊科、錦葵科、蘭科植物方面，享譽世界。身故後，胡博士之門生故舊、同僚友好為紀念胡博士生前在中文大學創建之「生物標本館」（現藏三萬八千份植本），表揚胡博士之貢獻，會將呢個標本館命名為「胡秀英植物標本館」，仍設於中大科學館，2015年移入新建成嘅「生命科學大樓」，為此要籌集一千五百萬元研究基金，用於繼續收集與釐定保護植物、監察有價值植物、研究及教育社會大眾有關植物、樹木常識及植樹計劃等意義深遠。各界社會人士有意捐款資助者，請寫支票交往新界沙田中文大學生命科學院院長朱嘉濠教授，多多益善，少少無拘，支票抬頭人寫「香港中文大學」。
講起植樹，最近因為打大風，近千棵樹木倒塌，令港鐵東鐵暫停幾小時，對好多人唔方便，點解啲樹咁容易倒塌呢？左丁山見到草皮博士李賢祉，佢講到一疋布咁長，跟住向左丁山講述「胡秀英標本館」計劃，原來佢最近努力為此計劃奔走，周圍勸捐，佢自己讀植物學，精研樹木與草皮，敬佩胡秀英博士不得了，成七十歲人咯，呢位倪匡舅仔一講到樹木花草就雙眼發光，熱情兼肉緊。聽佢講完香港樹木容易倒下嘅解釋，醒起彌敦道百年古樹群，好似步入垂危之年，隨時會自然死亡或被林鄭月娥司長拍板斬掉，一下子刪除過去一百年香港人之集體回憶，實老樹危急存亡之秋也，問李博士：「你身為樹木專家，應該挺身而出，為香港人服務，救番呢啲大樹噃！」李博士唔一聲：「有康文署與樹木辦在，乜嘢專家都冇符。佢地有權力、無樹木知識，我地外人有乜好講？透過不同嘅樹木研討會，我地知道台灣農委會農林業實業所有『樹木褐根病對台灣老樹之危害』嘅研究，台灣中華科技大學及台北市立教育大學三位專家胡寶元、姚怡均、陳莉臻發表過『褐根病防治及監工實務』報告，但我地特區政府官員對此視若無睹，一味話每個月去噴樹，都唔知噴啲乜鬼嘢落棵樹度，唔識可以問人嘅啫，香港樹木辦連問人都懶問，繼續係咁搞落去，柏麗大道會變成光禿大道！」