呢排香港啱啱搞完書展同動漫節，真係睇厭啲模係咁拋胸；諗住奧運開幕，睇吓正氣嘅運動員，淨化一吓身心，點知都係波濤洶湧，講緊嘅係中國女泳手陸瀅。
23歲嘅陸瀅周日喺倫奧100米蝶泳攞銀牌，對中國泳手嚟講已經係好成績；佢嚟緊仲會幫中國出戰4x100米四式接力，星期五就初賽，星期六係決賽，唔知佢仲有冇牌攞呢？
陸瀅仲有另一個焦點，就係佢嘅驕人身材。話說2011年9月上海舉行一個晚會，「欄王」劉翔以團委副書記身份亮相，陸瀅就坐喺佢身邊。當時陸瀅身穿緊身Polo恤，將驕人嘅身材表露無遺，連劉欄王嘅風頭都掩蓋晒；更有網民笑言，陸瀅由5歲開始練水，17年嘅苦功，都及唔上一張合照換嚟嘅名氣。
一年未夠高山變機場
不過，陸瀅今屆倫奧身穿緊身泳衣作賽時，就令男粉絲好失望，高山竟然變咗「希斯路機場」！到底發生咗咩事，當事人就冇講，或者喺上年嘅晚會，陸瀅「裝胸作勢」，呃晒劉欄王同在場人士；又或者陸瀅希望奧運有好成績，大戰前夕去拆彈，等自己更流暢唔阻水，如果呢個原因係正確，陸瀅呢塊銀牌真係有血有淚。
賽後陸瀅就好感觸，多謝教練崔榮登一直支持同鼓勵佢；仲話如果冇崔教練，自己已經轉咗行。家陸瀅拎到成績，其他人都唔會再講佢喺劉翔身邊嘅女人，而係一個有實力嘅運動員。
