股份兩極化情況持續，差嘅原因之一，係之前晉佳講過部份上市公司負債太重；其次係內地工業生產表現太差，所以儀征化纖（1033）等上游工業股變成一潭死水；第三係半新股質素太曳，衰嘢開始浮上面。
揀好股，先決條件係要避開上述因素，其中一隻較可取嘅係創科實業（669）。
創科將於8月16日公佈中期業績，睇佢近期股價表現，加上美國經濟唔太曳，相信以佢嘅產品極具競爭力，業績表現會相當唔錯，大可現價買入，短線等業績收成，或者成為長揸嘅對象。
創科07至08年重組全球業務，未計重組費用、聯營公司業績及稅前溢利，每年大約1.2億美元。重組完成後，舊年終於收成，未計重組費用，應佔聯營業績及稅前溢利按年升三成，至1.61億美元，其中下半年盈利升幅同樣有三成。
中線睇12蚊
即使美國樓市表現差，不過，創科經常Upgrade產品款式，競爭力一向強過同業，所以縱使行業唔好，創科產品依然賣得唔錯。
券商估計創科今年每股盈利0.113美金，按年升兩成，預測2012年市盈率11.7倍，睇落估值唔算貴。
近期突破10蚊阻力，有一浪高過一浪之勢，業績前後博上番11蚊唔難，如果港股跌唔落，中線可以睇12蚊，穿9蚊就要止蝕。
歐陽風外遊，晉佳代筆
晉佳