利物浦上星期六喺美國巴爾的摩對熱刺，場波一句0:0就差唔多已經可以講完；不過利記中場查理阿當搞到加里夫巴利差啲未開季先收工，就搞到熱刺新帥波亞斯（AVB）賽後火都嚟埋，仲話要英格蘭足總調查事件㖭。
話說場波踢到19分鐘，威爾斯國腳巴利引球推進嗰時，無啦啦喺後面殺出一個嚟自蘇格蘭嘅查理阿當，後者速度輸足9條街，巴利自然當佢冇到；點知呢位前黑池中場突然使出一招「天殘腳」，一嘢踩落巴利度！23歲嘅巴利仔，梗係即時碌喺地啦，出名肉緊嘅波仔見到都眼火爆。賽後佢話：「我覺得阿當嗰一下攔截太肉酸啦，巴利都推過咗，佢仲要從後監粗踢人！我唔知佢兩個之前有咩過節，但係我家明晒啦。」
收巴利咧有前科
以我求大俠所知，AVB口中嘅過節應該係2011年查理佬未過檔紅軍，仲係黑池仔；季尾要護級嘅黑池作客熱刺，阿當以同樣伎倆收咗巴利仔皮！後者最後傷3個月，要提早收咧。波仔之後又爆話阿當半場搵過佢：「半場嗰陣查理有嚟搵我，同我講番件事。我接受佢解釋同道歉，但係我覺得佢應該要同巴利道歉囉！」計我求大俠話，查理阿當肯定受過國民教育，所以聽到巴利自稱有傷拒為英國隊踢奧運，一時愛國心切，想幫英國人教訓吓呢位詐傷嘅蛋散。不過教訓都有好多方法，絕對唔需要踢人囉。
另一邊紅軍教頭羅渣士就好少理，賽後都係講番安祖卡路爾嘅轉會傳聞。不過之前話卡路爾走都ok嘅佢，竟然反口話：「卡路爾喺利記嘅生活好愉快，冇諗過要走。而且我覺得佢會fit我哋嘅新踢法，冇需要急於送走佢。」真係乜都你講哂！
