左丁山識咗林奮強近二十年，其實識佢媽咪莫秀馨校長更早，莫校長係中大教育學院校友，經常參加校友會活動，從來唔知道林奮強係佢嘅公子，直至到林奮強有一次話：「我應該叫你做Uncle！」先至知道兩者關係。林奮強應邀入行政會議，令左丁山大吃一驚，佢同梁振英唔係咁熟啫噃，佢要在「黃金五十」發表一連串報告之後，梁振英先至主動打電話約佢見面，傾吓「黃金五十」之研究報告，作為佢競選政綱之參考材料，其後唐英年競選辦亦有請林奮強去做presentation，講咗個幾兩個鐘頭。左丁山問過佢：「你挺梁還是挺唐？」林奮強話：「無所謂挺邊個，我挺香港，希望香港能把握黃金機會，不要錯失時機，要做大個餅，增加硬件供應，否則香港經濟陷入嚴重瓶頸，通脹惡化，失去競爭力，益晒新加坡，我地已經人口老化，下一代若無良好就業機會，點算好？」
知道林奮強入行會後，左丁山又為佢擔心：「你揸住咁多樓，他日可能成為政客攻擊話柄，你點辦？」林奮強話：「我諗過嘞，以後五年食穀種，預備賣去五個住宅單位，為未來五年儲糧（包括供養母親），其他單位五年內不賣，也不再買任何本港物業，呢啲會循行會規則申報，至於行會成員酬金，每個月有六萬幾，我會捐晒俾『陳校長免費補習天地』，呢個機構專門為基層兒童、新移民兒童補習，我太太做過義工，替一位新移民細路補習英文，補到佢由完全唔識英文至考入香港華仁！呢個機構好值得支持。」
古代有枵腹從公，現代人當然冇咁偉大，林奮強自離開UBS之後，全無薪酬收入，去年創辦「黃金五十」，一個仙外來捐款都唔收，一年來用咗佢唔少錢，本來以為做完晒Project就考慮重返金融圈賺錢，點知會俾新政府睇中，邀請佢加入行會，於是佢惟有賣幾間屋套現，攞番啲現金。呢啲事本來係好穩妥正常嘅財務規劃，點知有報紙作大，民主黨李永達又乘機抽水，批評林奮強賣樓，形象上引起社會質疑，惹人非議。有乜好質疑呀，李永達？咪咁小心眼啦，單打他人唔會為你帶來選票嘅，做吓實事先至好！