喺體育比賽，啲人成日講主場之利，可想而知身為東道主喺奪得好成績上面，有幾着數；不過今屆倫奧嘅東道主英國喺首個比賽日就認真失威，莫講話衝金，連一面牌都攞唔到，真係差啲就要下半旗致哀㖭！
一睇今屆倫奧出金嘅秩序安排，就知道英國好苦心想好頭好尾，喺第一個比賽日，擺大頭就有男子公路賽，好明顯想英國嘅公路賽世界冠軍卡雲迪殊響頭炮；而「跳水神童」戴利就守尾門，喺倫奧尾二一日嘅男子10米台跳水中爭金。
單車隊甩晒轆
可惜呢啲都係英國一廂情願嘅諗法，喺上周六嘅男子單車公路賽，卡雲迪殊實在目標太大喇，成日俾人圍攻，就算有隊友兼環法冠、亞軍韋堅斯同埋科美護航，結果只得29名。佢賽後都好失望咁話：「似乎其餘國家車手嘅目標並唔係勝出，而係唔想我哋英國勝出，對於佢哋咁負面嘅戰術，我感到好失望。」
梅禮兄弟雙打即死
主場觀眾嘅失望仲係一浪接一浪㖭！喺游泳池度，被視為英國獎牌希望嘅新星米妮，喺女子400米個人四式中只得一席第5；而佢嘅風頭，就梗係俾以破世界紀錄成績奪標嘅中國小將葉詩文搶晒啦！
喺爭獎牌賽事表現麻麻，英國連喺球類嘅初賽亦都表現唔好。英國首席網球手梅禮夥拍佢哥哥占美，喺男雙首圈就爆冷遭奧地利嘅梅沙同埋派亞淘汰。另外，更有報道指女子馬拉松世界紀錄保持者英國嘅蕾姬芙，因傷關係，好可能要退出倫奧馬拉松呀！