做咗廿年立法會金融服務界議員嘅詹培忠由99%機會唔選，到100%選，再突然話退選，認真峯迴路轉，估佢唔到，已經報名參選嘅亨達集團主席鄧予立一於少理，按原定計劃繼續喺倫敦睇奧運，下個月10號先返嚟同其他參選人埋身肉搏。
鄧予立話自己唔做運動，但就好鍾意睇體育運動，三個月前已經買晒飛睇倫敦奧運，淨係開幕禮都要7000英鎊，睇幾場游泳、籃球比賽又要二、三千英鎊，加埋成十幾萬港紙。畀咁多錢飛到英國睇，梗係要睇夠兩個禮拜先返嚟啦。
雖然話立法會選舉嘅拉票活動即將開始，詹培忠突然唔玩，好幾個人可能出嚟選，鄧予立都決定8月10號先返嚟參戰。佢認為，認識佢嘅、會投票畀佢嘅選民始終會投票畀佢，留喺香港用多一兩個星期拉票，對選情影響唔大，佢對於勝負亦心裏有數。照咁講，鄧生究竟想唔想贏呢？