六千幾蚊一呎居屋，簡直貴到無倫，我夠可以投地起樓收租咯！雖然只係講緊最新大富翁MONOPOLYZapped，不過佢將傳統紙板玩法結合iPad元素，化繁為簡，將過往分錢、數錢、砌卡等麻煩步驟一一交畀iPad去做，買豪宅碌吓張卡就過數，勁過明星名人嘅白金精鑽VIP無限額信用卡啦！
記者：陳國輝
攝影：周旭文
模特兒：Alia、Fiona@Zmodel
查詢：孩之寶（23021221）
平板銀行碌卡過數
香港地本質始終離唔開金融，就算幾歲小學雞，媽咪都想佢未來做大班Banker印印腳。估唔到連新版MONOPOLYZapped都與時並進，將Banker角色電腦化；玩咗幾廿年，一向都係由其中一名玩家負責做Banker，數錢派錢忙到甩轆。新版反傳統，改由iPad擔任銀行職務，當你擲完骰仔，下一步就要Click入Banker畫面，選揀對應行動；例如你踩中一幅未投地皮，便可於iPad上選擇買地起樓，當然，若該地已有地主，你自然要乖乖畀過路費。加入iPad後最過癮地方，係每人都有一張專屬CreditCard來取代傳統紙幣，只要交易時平放在iPad上，就會聽到悅耳嘅「咔嚓」碌卡聲，你收入幾多、支出幾多，甚至身家幾多，喺iPad上也一目了然，又幾方便喎。
「機會」變成MiniGames
老實講，就算玩咗咁多年大富翁嘅你同我，都會嫌新版太過複雜。永恒不變嘅先買地後起樓、再起酒店，基本玩法不變，但涉及金融領域知識卻大幅提升，例如你要明白乜叫按揭，萬一無錢供樓、交租或納稅，你就要用自己嘅資產作抵押，或拎出來公開拍賣還債，只差未玩埋孖展同槓桿原理咋！小朋友或英文唔叻嘅玩家，可能投入唔到喇。
當你踩中「機會」，會出現如推銀仔般嘅MiniGames，贏咗仲有錢收㖭。不幸踩中「坐監」，亦可以遊戲方式逃獄！加入iPad輔助後嘅大富翁，的確增添不少熱鬧氣氛。
MONOPOLYZapped（$279.9）
類型：智力棋類
語言：英文
支援：iPhone、iPad、iPodTouch
玩家：2至4人
