【本報訊】政府耗資400億元推行新界東北發展計劃，最後階段諮詢八月屆滿，但這個牽涉上水、粉嶺及坪輋打鼓嶺三地區、逾萬村民的重建項目，賠償及安置問題一直談不攏，村民的不滿情緒升溫，今日將有千人大集會，揚言採取最後抗爭行動，將比菜園村激烈百倍，誓死保家園！
記者：葉競科、龍宇畧
該新界東北發展由08年開始分階段諮詢，但五年諮詢下月底屆滿，政府至今仍未能回應村民訴求。「我間屋俾大型發展商豪宅包圍，嗰度每間屋賣2,000萬到過億，佢哋都吼咗我塊地好耐啦！點解我一定要接受政府嗰幾百萬賠償，將住咗幾代嘅土地拱手相讓，最後俾大財團發展豪宅，自己從此被迫上樓屈喺細單位？」古洞村長曾家新激動說，雖然政府宣稱有賠償，更在古洞劃出土地安排合資格者上樓，但賠償多少？何謂合資格？上樓有否資產審查？原區安置是否需要交租等，卻苦等無答案。
非原居民將被滅村
「呢個以人為本嘅計劃中，冇當我哋係人！」本身為土木工程師的古洞村民張先生批評，政府做法「明恰」非原居民：「古洞喺正落馬洲支線，政府實要郁動，但佢哋避重就輕，唔搞凝聚力強、掌控鄉事勢力嘅原居民村以減低阻力，相反非原居民就放心滅村。」
目前古洞約有6,000名村民，老人家習慣簡樸生活，村公所「聯鳳堂」負責人鄧先生坦言：「公公婆婆每日嚟坐吓傾吓偈！你逼老人家上樓，變換生活圈子，見唔番同聲同氣嘅老友記，等於送佢哋一程。」果園負責人羅先生亦講出不少村民心聲：「我哋中環做白領，每當放假都返嚟陪老竇種生果，再一齊攞去蔬菜合作社賣，為嘅唔係錢，係想維繫親情。我家族食飯最少開兩張大枱，係返嚟舊屋先至夠地方。政府收地之後，家族就失去聚腳點，老竇亦冇晒寄託。」
村民反抗情緒強烈
在三個地區中，以人數最多、幅員最廣的古洞村民反抗情緒最強烈，今日將於村內與政府官員會面，並已號召近千人出席。有村代表揚言，如果會面仍未有結果，會跟粉嶺及坪輋打鼓嶺代表聯手，將抗爭行動升級，「上年菜園村收地已經咁大迴響；我哋村民過萬，如果堅拒清場搬遷，場面何止激過佢哋百倍！」