強國蛋糕股克莉絲汀（1210）上市5個月就發盈警，單日暴瀉33%，民企圈錢後散水又添一例。呢幾年，李小加瘋狂使出屈機五式，經紀散戶齊齊被屈到嘔白泡。
第一式：疲勞轟炸。交易時間由4粒鐘變5.5粒鐘，好似韓劇咁拖長嚟做，消磨戰意，睇到散戶瞌眼瞓頂唔順離場，C組經紀冇啖好食。
第二式：中門大開。新股上市易過問邦民借錢，港交所（388）為賺上市費有求必應，可謂「企業黃大仙」，洪良國際（946）、大慶乳業（1007）、歲寶（312）百貨，上市冇耐就出事。有企業爆煲就賴保薦人，A字膊上身。
第三式：天價收購。180倍PE買LME，貴過科網股，盡顯好大喜功性格，仲猛Sell中國故事，同「如果全中國一人買一件就發喇」呢種概念冇分別，註定摧毀港交所價值。
第四式：隨意停牌。博士蛙（1698）暴瀉唔理，上海醫藥（2607）洗倉唔問，押股被斬倉又當透明，停牌是是旦旦，妄顧散戶利益。
第五式：雙重標準。經紀Sell客唔錄音就重罰，披露易Down機、散戶睇唔到通告就冇件事。嚴以律人，寬以待己，腐敗程度令人咋舌。
李總，打街霸屈機都俾人話冇品，何況係港交所？希望你慈悲為懷，唔好再搞搞震，屈乾散戶嘅血汗錢。
魏力