國民教育科搞到全城起哄，喺財經界一樣有洗腦活動。近期最矚目收購活動，要數越秀地產（123）以超過百億元向越秀房託（405）出售廣州IFC物業。外界稱今次收購為「蛇吞象」，牌面上明益阿媽（越地），阿仔（越房）唔着數，但上周初最終以超過98%大比數通過。股榮覺得城中一眾財經演員，功不可沒。
翻查由5月28日落實公佈交易後，根據wisers紀錄，兩個月內單是本港傳媒，包括報紙及雜誌，合共有127則相關收購報道及分析，當中有超過一半（65篇）屬投資意見，平均每日有一篇文章提及收購。再細分，唱好或傾向支持收購的佔60篇，佔92%，反對及有保留的，只有五篇咁大把，佔比唔夠一成。
深入睇60篇唱好報告，堪稱全方位、多角度推銷，包攬所有報刊雜誌，包括11份主流及親中收費報章、四份免費報、三份財經雜誌。而城中所有財演近乎全線上陣齊齊捧場。短短兩個月間，有三位竟然各推介四次之多，用字異曲同工，千篇一律，例如收購締造雙贏、兩全其美、照顧小股東利益，總之叫大家睇長遠些，越房執到寶，長揸有着數。
據知，今次越秀系管理層落咗聖旨，收購唔衰得，除了約晒基金股東解話外，更向全城分析員、財演，以及有地盤的所謂獨立股評人埋手約食飯，而寫得最積極的其中兩位，傳聞被委以重任，負責組織小圍飯局。
越房購母資產 禍福難料
綜合唱好收購的文章有兩類，一是原文隻字，照搬飯局上負責人推銷收購的重點，欠缺個人分析。股榮都有參與飯局，因此對推銷重點有個概念，往後留意到各篇文章，發現似曾相識，其實不過是原文照錄。被人植入印象後，不經消化，然後向讀者灌輸，這種是最不負責任的。
另一類唱好就較高明得多，例如指收購項目每平方米2.9萬元，相比恒大（3333）同區地皮要3.3萬元，豈不是麪包平過麪粉？
坦白講，股東接到一本數百頁如黃頁電話簿咁厚的收購章程，某程度要透過專家分析箇中好壞。投資者要獨立分析，而非人云亦云，散戶甚至讀者不知不覺下被植入收購超筍的概念。
相比之下，五篇提醒及溫馨提示報道，即使分析獨到，卻如滄海一粟，未成氣候。事實上，自收購公佈後，越房股價三日內曾急跌15%，幸在全城護航下，股價由谷底反彈，返回停牌前相若水平。收購是福抑是禍？未來自有分曉，但投資世界向來是輸多贏少，今次會否歷史重演呢？
P.S.國民教育淪為洗腦教育，唔想下一代變紅衞兵，今日維園見！
股榮