譚詠麟和杜麗莎的紅館個唱前晚舉行尾場，譚母現身捧場，但未見紅顏知己Wendy及兒子曉風，阿倫聲稱兒子有捧場還大讚他有型。不過一向口不擇言的阿倫，因踼爆杜麗莎人有三急用尿袋，令杜麗莎發脾氣，阿倫知衰即拍背呵番。
譚詠麟和杜麗莎合作的「TimeAfterTime演唱會」前晚舉行最後一場，全場爆滿，其中阿倫媽咪、好友如陳友、陳自強、鄭融及李亞男等前往捧場，雖然當日下午兩人要補做早前打風取消的一場，一日內要唱兩場騷，但絕無影響兩人的表現，阿倫更high爆，在安哥部份不停又唱又跳。
「唔好講垃圾嘢」
一向口不擇言的阿倫當晚不停爆杜麗莎料，提到兩人出場時的公主王子打扮，阿倫笑杜麗莎說：「有人話我哋似童話故事，特別係你，似史力加公主，搞到我唔敢望你，怕忍唔住笑，真係好似。」接着兩人在台上邊飲茶邊傾偈，但阿倫竟爆料說：「唔好飲咁多，一陣尿頻，要攞定膠袋喺台下。」杜麗莎聞言即扮喊，擺出一副嬲樣。
完騷後兩人在後台接受訪問，提到阿倫爆杜麗莎在台下要用膠袋小解，他即說：「冇嘢呀，玩吓之嘛，假嘅。」但在旁的杜麗莎明顯有火說：「唔好講呢啲。」有指杜麗莎的公主look似史力加公主，她即說：「不如你哋講吓我唱成點，唔好講埋呢啲垃圾嘢。」阿倫見勢色不對即拍杜麗莎背脊呵番。
讚曉風有品味
問到會否開part2？阿倫表示希望香港有更多不同場地搞騷，即使只坐幾百人都沒所謂，但記者指有些歌星去完紅館不能在細場開騷，阿倫說：「做artist要知自己位置，有大有細，係你係你，唔係你夾硬上都冇用。我唔係講乜人，只係自己心態係咁。」
問到曉風有否捧場？阿倫說：「好多場佢都有嚟，佢話我今晚超型，平時都型。其實佢好細個就聽我啲歌，大個咗就聽英文，近日又聽我啲歌，真係有品味。」阿倫坦言有時出埠旅行會跟曉風去的士高跳舞，更跟他大跳辣身舞。
採訪：王連連
攝影：仇志德