90年代，李莉莉憑騎呢出位舉動成為風頭人物，被封出位始祖和阿伯殺手。不過，近年在娛圈消聲匿跡的她，原來愛上農家樂。兩年前，李莉莉在江西買了三個山頭種蔬果養家禽，堅持以冇農藥、冇公害的食材饗大眾，一代阿伯殺手唔殺阿伯殺雞鴨。
撰文：戴彩煥
現年42歲的李莉莉在1988年以李麗嫻之名參選亞姐落敗後，翌年改名李莉莉再戰澳門小姐，結果成功挾季軍名銜進軍娛圈，90年代憑住騎呢惹火招式成功出位，試過將胸圍底褲當面衫着，也試過首映禮「露毛露胸」，在三點位置貼上「胸」、「毛」貼紙搞噱頭，甚至試過攬住80歲阿伯狂咀宣傳寫真，騎呢出位招數超乎人類想象。
自種健康食物
不過，這位出位始祖及阿伯殺手早已厭倦多姿多采的娛圈生涯，兩年前，李莉莉投資逾千萬在江西買了三個分別一千畝大的山頭種蔬果養家禽家畜，生活由燦爛歸於平淡。
李莉莉說：「早幾年登台時認識咗唔同地方嘅高官，同佢哋食飯時發覺佢哋食嘅嘢好新鮮，我喺香港食嗰啲又打針又有激素又有農藥。我覺得家啲人唔愁食唔愁穿之後，開始追求健康，但家四處都好多假嘢，雞蛋又假、西瓜又假，令我想做多啲真嘢出嚟，唔想畀啲假嘢霸住晒，所以我要種啲冇公害嘅生果疏菜，養啲冇打針嘅家畜家禽。我家有三個基地，一個種紅肉橙、紅肉碌柚同蔬菜，一個養魚養雞養地龍養竹鼠，另一個就用嚟起動物園，遲啲做埋旅遊生意。我由細到大都好想擁有一個動物園。」
昔日活在水銀燈下，今日要日曬雨淋，每朝5點起床，晚上8點上床休息，生活看似刻苦，但李莉莉卻樂在其中：「最辛苦係俾蚊咬，但最大得着係上到山有負離子，冇污染空氣，個人精神好多，呢啲係錢都買唔到。」不過，由於李莉莉長時間在內地務農，每個月僅能回港一、兩次探望子女。
沒有丈夫和子女在身邊，李莉莉也不愁寂寞，因為做農婦也有四大金剛護駕，地位非同凡響。李莉莉說：「我啱啱嚟投資時一直想低調啲唔畀人知，點知招商局講咗出嚟話有明星投資，好多人成日走嚟睇我，搞到好哄動、好麻煩，所以我請咗四個保鑣，佢哋以前都係當兵同做警察㗎。」
緬懷昔日爆紅
今日模出盡法寶鬥出位，不過在出位始祖眼中只是濕濕碎。李莉莉笑說：「好多年前我已經將胸圍底褲同面衫面褲掉轉着，我出嚟效果係有美感、係靚、唔核凸。以前我着啲衫『一忽忽』，戴耳環只係戴一隻，着鞋着鴛鴦，家好多人跟我咁着，呢啲潮流都係我創。」
那些年做風頭躉日子，李莉莉依然懷念：「當年我唔使剝都好紅好轟動，有年TVB搞咗個騷撼宮雪花嗰屆亞姐，搵我同四大天王做，班記者影我影咗足足五次，四大天王都係影咗一次咋。」不招人妒忌是庸才，李莉莉自爆當年因經常成為風頭躉而被萬箭穿心：「我成日搶晒鏡，幾乎日日見報，其他人妒忌，唔同我傾偈，所以我真係冇乜朋友。有啲人唔抵得我咁紅，話我啲新聞係用錢買番嚟，成日畀人講是講非，所以後來我特登整咗件火箭衫着，用火箭射番佢哋。」
96年李莉莉與澳門煙花大王後人麥競敏結婚後退出江湖，專心照顧丈夫及一對寶貝子女，直至04年李莉莉突然宣佈復出，她與麥競敏的婚姻亦盛傳亮起紅燈。對於05年與麥競敏離婚傳聞，李莉莉連聲否認：「嗰陣我成日返內地，啲人搵唔到我咪話我哋分開，我費事越描越黑，先至冇去解釋。」據悉，李莉莉早年確與丈夫分開，但近年二人已經低調復合，在丈夫精神和金錢支持下，又難怪李莉莉可以專心在內地拓展她的農務事業。
