《無間道》、《竊聽風雲》系列，牽涉的是高科技，內裏葫蘆都是勾心鬥角的人性黑暗面。今趟梁朝偉拍麥兆輝、莊文強，重用摩斯密碼於合拍片《聽風者》上，既有陰謀、反間，又有偷聽、諜戰，集《無間道》及《竊聽》於一身，表面如此，其實一切科技都是幌子，骨幹是周旋於片中四位主角之間的愛情。現實中麥、莊兩位導演經常出口術，引到梁朝偉這個影帝「撈」，更甘於扮盲收埋電眼，招數比偉仔的詠春更有宗師味道。 撰文：文國駿
上映日期：8月10日
導演麥兆輝及莊文強早前為共同執導的新片《聽風者》於中環接受專訪，《聽》片是改編自內地小說家麥家的小說《暗算》，對於麥家陌生，但講起他另一本小說《風聲》，相信對他的作品會有概念。當中原著情節涉及的偷聽、諜報情節極合麥、莊二人的口味，自然成為開拍的題材。正好《無間道》經歷十年，令《聽》片更具意義。
幾乎重寫故事
至於改編故事跟自行創作，兩位導演表示基本上運作一樣，麥兆輝笑言：「事實上冇乜難度，因為電影跟原著唔係好同，我哋都改左7、8成，差唔多係重新創作，當然有同麥家講過，得佢同意，起初佢都嚇一嚇，不過睇咗劇本之後都好滿意，因為有好多情節需要顧及電影感同節奏，麥家講笑話可以用電影劇本寫番一個長篇小說。」
莊文強認為創作人不應拘泥改編還是原創，只要拍的是好故事就可以。不過內地電影業日益蓬勃，隨之而來的問題對拍攝帶來影響，他們覺得電影人要面對及解決的問題越來越多，莊文強表示：「喺內地拍嘢成日都俾人話阻街，所以一係好早拍，一係就好夜先拍，同埋上面拍戲成本都越嚟越貴，如果想拍一套小品電影，冇4,000萬都拍唔到。」成本高漲但大部份支出都用在演員身上，令到製作費及演員片酬不成正比，往往要壓縮製作來遷就，影響質素，麥、莊覺得這是目前要正視的問題，否則華語片要跨出海外會有很大難度。
自認怪雞導演
今趟再拍梁朝偉，重彈《無間道》的摩斯密碼舊調，多少有一點捉狹味道，其實玩的又豈止於此，更搞鬼的是要梁朝偉演失明人士，經常帶墨鏡拍攝，不可以用眼神做戲才是好戲。不過翻看歷史被搞鬼的巨星又不只偉仔一人，莊文強笑言：「我哋係咁怪雞㗎啦，之前都試過將黎明喺《情義我心知》變低能，又要古天樂做阿伯，work㗎！我哋好少搵演員做擅長嘅嘢，因為睇得多會好悶，創作係需要有新意。」
麥、莊笑偉仔在拍攝期間曾因為太忘我投入視障的角色，有次差點弄假成真，莊文強說：「有一場戲係喺竹林度拍嘅，有好多樹，周迅行前佢行後，點知見到偉仔一路行去樹枝尖都唔停，好彩周迅醒目，幫佢一手撥開。事後偉仔話唔知乜事，佢嗰刻好似真係盲咗咁，冇留意到有危險。」
對於近10年第四度與偉仔合作，麥兆輝坦言：「我哋好多電影都想搵偉仔演，因為我哋本身好好朋友，除咗工作外都會見面食飯，嚟緊拍乜戲都會話畀佢聽，不斷用故事引佢。」對於今次成功引得偉仔入局，莊文強謂很大原因是基於上一次合作未能成事：「其實嗰陣偉仔都睇過《竊聽》第一集嘅劇本，角色就唔講喇，不過因為時間夾唔到，佢仲拍緊《一代宗師》，點知部戲出咗嚟之後佢睇咗，仲即刻問我哋《竊聽2》點，會唔會搵佢，不過佢應該都係講笑，引番我哋。」
常被偉仔怪責
莊文強又表示偉仔不只一次「責怪」他們沒有找自己演出：「佢睇完《飛沙風中轉》又叫出嚟食飯，又問我點解拍呢部戲都唔搵佢，又話自己最鍾意演呢類戲，都唔知佢講真講假。」獲得影帝級的偉仔屢次「撈」，絕對是對二人的一種肯定及認同。至於正在籌備的《竊聽3》會否拖好友下水，他們異口同聲說：「諗下先啦！不過其實偉仔都好忙，哈哈！」
另外，麥兆輝於上年曾傳出腦部患有腫瘤消息，雖然他事後澄清只是內分泌失調，他說：「係呀，其實已經好番哂，之前都有唞咗一段時間，嚟緊今年同下年都會拍番多啲戲。」
情報室：重現低科技諜戰
又是梁朝偉加摩斯密碼的結合，多得《無間道》的編劇麥兆輝與莊文強。電影《聽風者》故事圍繞的701情報室是內戰結束後，內地負責監控台灣方面的特務機關。偌大的情報室內坐着50多人，責任是鬥快追蹤、搜尋台灣方面的頻道譯成摩斯密碼。
香港展出
50年代的產物自然很低科技，但在當時來講是破解敵情的絕密機構。這個60年前產物的情報室將會在香港重新組裝，於8月1日起在尖沙嘴的LCX商場重現，回顧一下當年的特務、諜戰在沒有微型攝影機、熱能探測及微收發器材之下是如何展開的。
情愛篇：周迅拒愛偉仔
《聽風者》故事講述共產黨建國初期，從事諜報工作的諜報室忽然失去台灣方面的電訊情報，為尋找出色的偵聽員，行動局成員張學寧（周迅飾）找來盲眼的何兵（梁朝偉飾），何兵以超乎常人的聽力，數日間找回敵方50多個消失了的電台，一夜間變成英雄。
諜報失誤
何兵對學寧有愛意卻遭拒絕，最後他跟同樣在偵聽局工作的沈靜（范曉萱飾）結成夫婦。因為一次諜報失誤，令學寧指揮的行動組一夜間全軍覆沒，就
在何兵為了彌補過失不眠不休的傾聽敵方電台中，居然讓他找到敵方特務頭子「重慶」的身份……