文憑試放榜後，肥仔K收到唔少電話，來自中學同學呀、姨丈呀、長輩呀之類，都係問佢去美國讀社區學院好唔好呀一類嘅問題。點解要問肥仔K呢，原因係佢當年會考成績只得十七分（最佳六科），不能返回原校讀中六，唯有即時放洋去加州讀社區學院，兩年後轉入UCLA讀三年級，大學畢業還要比在港讀中大科大港大理大城大嘅同學早一年，後來仲去埋倫敦及東京讀碩士，留在海外居住咗九年，所以在中學同學之中，成為「留學專家」。
本來考文憑試成績欠佳，例如中文失手，考到1級或2級咁樣，其他科目即使考得好好，在本地升讀大學嘅機會大打折扣，或近乎零，但去美國讀社區學院就冇乜所謂啫。肥仔K話美國社區學院數目多到不得了，各有所好，但為十七八歲男女學生選校嘅話，總要考慮到（一）兒女第一次出外，要適應環境，如去東西兩岸，比較容易，去中西部一啲城市，冬天冷到零下三四十度，冰天雪地下搭巴士上學十分不易，十八歲女生最易感到寂寞思鄉，無心向學。當然，中部州份小城嘅住宿租金非常便宜，一定比三藩市灣區、矽谷（Foothill所在地）便宜幾倍；（二）每一個州嘅社區學院與州立大學之轉校安排，並不一致，要揀做慣做熟嘅州份，轉升大學就少啲錯誤溝通；（三）從社區學院升讀州立大學，都要睇吓州立大學有無名氣，例如在華盛頓州讀社區學院，成個州只有西雅圖市華盛頓大學係名列前茅嘅大學，其他州立大學無甚名氣，但在加州就有起碼八間加州大學名列全美前五十名，讀任何一間都好OK，選擇多好多；（四）肥仔K話好多學生可以上網報名申報社區學位，唔駛一定去搵Agent，有一位同學「被介紹」往東部某名氣學校，一年費用高逾四十萬港紙，雖然呢間係一流學校（肥仔K參觀過該校），但讀兩年貴唔貴啲呀？又有一位被介紹往中部某州，冬天冷到震，鄰居相隔一二十英里，香港學生是否可以習慣咁孤單寂寞嘅生活！剛從Foothill回來放假之女學生，奧利維亞更大彈啲Agent俾錯料佢，幾乎累親，話信自己仲好過喎！