「銀河艦隊」觸礁！皇家馬德里上周五作客賓菲加，喺一度領先2:1之下，最後以2:5慘敗，失落尤西比奧盃；但教練摩連奴賽後話，熱身賽嘅勝負唔重要，都係試陣啫。
弱雞後防負2:5
皇馬今場前線星光熠熠，希古恩、迪馬利亞同盛傳離隊嘅卡卡齊齊正選；不過後防勁弱，19歲中堅華拉尼同門將阿丹已經算最有級數，其餘都係二隊嘅成員。相反，賓菲加「夫添」咁濟，奧斯卡卡度素、韋素同奧斯華度加坦喺晒度，難怪佢哋4分鐘就靠查維加西亞嘅頭槌開紀錄。
失咗一球之後，皇馬先至醒一醒，荷西卡利祖喺19同21分鐘入波，幫球隊反超前2:1；可惜領先都未夠1分鐘，皇馬又輸頭槌，俾韋素頂入，兩隊半場2:2。
摩帥：友賽大敗唔係咩事
換邊後，皇馬換入啱啱歸隊嘅法比奧干查奧同賓施馬。值得一提嘅係，當時場上，雙方各有兩名倒戈嘅球員，皇馬有干查奧同迪馬利亞；賓菲加就有加雷同查維加西亞。講番戰情，皇馬後防喺下半場崩潰，俾賓菲加入多3球；上季借用到學生隊嘅安素佩雷斯梅開二度，加埋路爾斯馬田斯都有一球，幫助主辦球會賓菲加，5年內第3次捧走尤西比奧盃。
皇馬熱身賽慘敗，西班牙《馬卡報》嘅標題直指「皇馬仲放緊假」！教練摩連奴就為球隊減壓：「友誼賽大敗唔係咩大件事，賓菲加的確踢得好認真，但咁代表佢哋冇趁熱身賽試新嘢，而我哋就有試吓唔同嘅球員同陣式。」入球功臣荷西卡利祖話入波唔係最重要，最緊要係見到球隊嘅狀態一步一步提升。
