【本報訊】「會考慮同我咩……嗎」一名秘撈婚紗攝影的現役消防員，多次用手機WhatsApp撩女模性交，女模不甘受辱在網上公開證據，火速引起網民和其他受害人圍插聲討。受害女模炮轟這名私影「鹹蟲」不但背妻兒偷食，更視私影女為妓女，極不尊重女性。《蘋果》找到該名消防員，他承認自己衰鹹濕！記者：關震海 邱錦綉 黃江奇
近日一個名為「鹹蟲攝影師DragonHui問model（模特兒）可否上床？」的貼文，在facebook和討論區瘋傳，當中更附載攝影師和女模的手機情慾對話，火速熱爆網絡。
「你等唔等錢使？我哋可以上床，啲model好鍾意同我搞嘢」在婚攝界人稱Dragon的消防員許昭龍，年初邀請22歲私影模特兒Wing拍內衣照，事後提出不道德交易，令她大感譁然，「佢影相時好正經，估唔到佢……我影呢啲相唔代表我會賣淫！」
「我前途冇㗎嘞」
Wing接受本報訪問，指Dragon半年內一直騷擾她，「講真我好想約你出嚟你㗎！」，Dragon不但以「女神」稱呼她，又以WhatsApp暗示：「會考慮同我咩……嗎？」Wing拒絕：「我唔係嗰種人」，Dragon再追問：「咁錫得唔得？」Wing在電話打了「no」後，Dragon竟用另一個電話號碼繼續要求上床，Wing怒不可遏將對話大公開，更引來三名受害女模出來頂證，「上次佢（許）唔畀返相我，要我同佢做先畀我……不如告佢」。
被網友痛斥為私影鹹蟲的Dragon，旋即被起底，揭發他竟是現役已婚消防員，工餘兼職做婚紗攝影生意，育有一子一女。記者致電給Dragon求證，他支吾以對：「其實……我唔評論呢樣嘢，當我衰鹹濕，我又冇搞過佢，又冇犯法！」他否認有用WhatsApp性騷擾對方，聲稱是朋友偷用他的手機發短訊。但他坦言悔對妻兒：「如果公開晒呢啲嘢，消防嗰度……就好大鑊，我前途冇㗎嘞！」
記者昨晚到Dragon油塘公務員宿舍，沒人應門，鄰居表示：「佢成個禮拜都冇返嚟。」，消防處發言人證實許昭龍是機場消防隊海上救援隊隊員，署方會調查事件。大律師陸偉雄表示，女模可向平機會投訴性騷擾，或以「引人作不道德行為」告發該男子。
