電影《美國處男》長拍長有，倫奧剛開幕，短跑手鮑維早前自爆係處男，所以冇用過選手村派發嘅安全套；搞到隊友保特同全場記者笑唔停，呢套《牙買加處男》好笑過《美國處男》多多聲。
29歲嘅鮑維（AsafaPowell）雖然呢幾年風頭及唔上師弟保特同禾漢比歷克，不過仲係牙買加嘅4x100米接力中堅份子，負責衞冕金牌仲要靠佢；上個星期五鮑維同保特就齊齊出席牙買加代表團記者會，吸引400多位記者入場採訪。
當有記者問：「選手村至今已經派咗15萬個安全套，你哋攞咁多嚟做乜？」點知鮑維一本正經咁講：「我唔知喎，因為我係處男，我都冇攞過。」
坐喺身邊嘅保特即時笑到肚都攣，鮑維即時表現得尷尷尬尬，好似feel到自己講錯嘢，好在保特夠義氣幫吓佢：「我都唔知選手村有呢個服務，四年前我喺北京，都唔知有安全套派，而且我哋田徑隊好嚴，就算有安全套，都唔會有對象可以用。」
隊友保特出名爛滾
武俠小說講張三豐保住童子身，所以過百歲仲保持高強功力；不過現實世界就未必，3項世界紀錄喺身嘅保特，出名喺花花公子，之前都畀人影過佢夜蒲，6月更喺牙買加國內去完派對後返屋企時炒車，所以冇人懷疑過佢係處。
鮑維情史較為低調，但都傳過佢同牙買加小姐恩迪（YendiPhillips）拍過拖，面對樣靚身材正嘅恩迪，鮑維都忍住力保處男身，真係要頒番個忍耐金牌畀佢﹗