人人叫我做明仔，其實三十有四，囡囡都五歲。2008年金融海嘯，阿媽唔理我鍾唔鍾意，喺樓下買咗個兩房單位畀我，事關佢覺得我要結婚，始終要有瓦遮頭。單位原本叫價170萬元，做生意嘅佢狠狠地還價150萬元，業主都唔知係咪輸股票輸得好「甘」，話如果當晚搞掂就成交。
最初我同阿媽賭氣，市區樓點都好過新界樓啦，升值潛力高，點解要買呢度？仲要係居屋。其實我明白，阿媽唔想我搬去市區，怕天南地北，一家人關係疏離，於是乜都唔理，價啱就買，目的都係想留住我呢個仔喺身邊。
幾年來，算係住得舒服，有時行上樓上就可以返阿媽度飲湯，想去踢波、約朋友吹水、同老婆shopping，一個電話，阿媽就落樓湊個孫。
今日睇報紙，報道話家呢度呎價突破6000蚊，同我差唔多時候買樓、買咗西九的輝佬話：「你層新界樓仲貴過我層市區樓，有無搞錯呀？」老實講，我都覺得搞錯，不過，心底裏「拮拮笑」，原來以前人哋講啲乜乜理論，喺今日樓價瘋癲嘅時候，已經不管用了。究竟呢度喺邊？咪就係大埔富雅花園囉。
小老闆 明仔
本欄園地公開，歡迎各界來信，以450字為限，請電郵至mailto:[email protected]，
註明《家》樓民講場，請留聯絡電話。編輯保留文章的刪減權。