美國泳手洛捷迪喺游泳池嘅成就，暫未追得上有「新水怪」之稱嘅國家隊隊友費斯；但若然講到着衫，佢就贏九條街，仲明寸對方啲衣着品味好「娘」。
會喺倫奧男子200同400米個人四式同費斯正面交鋒嘅洛捷迪，日前接受訪問時笑喺京奧贏8金嘅費斯，好似超人主角簡奇勒咁，變身前薯爆，變身後亦只係得紅白藍三隻色。
衣櫃差一條皮褲
喺04同08年兩屆奧運攞咗3金1銀2銅嘅洛捷迪話：「每個頂級運動員都自己嘅獨特個性，啲人都話我好似搖滾樂巨星。我諗係啲衣着打扮，搞到我有啲rock味。查實我啲衣着都好簡單，不過我就鍾意襯好多飾物，好似係鍊、手錶或頸鍊等，有時我甚至會戴鑽石鍊㖭。我屋企嘅衣櫃仲差一條皮褲，但我應該會喺奧運之後買番條囉。」
費斯着到似超人真身
外號「爆炸狗」、現年27歲嘅洛捷迪喺之前嘅美國倫奧游泳遴選賽嘅男子200米背泳頒獎典禮上，就着咗對閃令令嘅綠色波鞋；而日前喺練水嘅時候，他亦show咗對有對翼係美國國旗波鞋畀大家睇，名副其實係潮人一名。
之前戴過鑽石牙套嘅洛捷迪繼續話：「超人係紅白藍色三隻顏色，費斯就好似超人咁，來來去去得幾隻色，所以佢嘅衣着顏色亦好穩陣；而且，佢喜歡實色嘅衫，但我就唔同，我乜嘢都會着。就好似粉紅色西裝咁，只要我喜歡，我就會著，唔會理其他人點講。平時我練水或比賽得三樣嘢，就係泳衣、泳帽同埋泳鏡。所以閒時我鍾意執得四四正正，等自己醒神啲；其實我本身冇着衫之道，鍾意點着就點着，總之令自己開心就得。」
