自從韋堅斯做咗第一個拎環法冠軍嘅英國人後，即刻變成傳媒嘅寵兒，除咗報佢手車有幾勁之外，大家都好留意佢連頭盔都遮唔住嘅「大的水」！英國《每日郵報》報道，韋堅斯嘅「大的水」被選為史上最性感「的水」，拋離「貓王」皮禮士利（小圖）同約翰連儂，完全睇得出佢呢排人氣爆晒燈！喺調查入面，有3成人撐韋堅斯，約翰連儂同「貓王」都係得11%，而前曼聯球星佐治貝斯就4%。