曼聯周三對申花場波，只係得一個入球，點都要做啲嘢向中國球迷補番數啦。前日佢哋就聯同瑞士名錶Hublot，喺上海辦咗個慈善時裝show，為聯合國兒童基金籌款。成班紅魔由費Sir帶領下（左圖），戴住靚錶、着晒唔同款式嘅西裝同休閒服行Catwalk，鬼咁有型；一名中國細路哥仲拎住寫上「帥氣」兩字嘅中國特色卷軸送畀班紅魔㖭（右圖）！