謝賢（四哥）嘅媽咪原來已經100歲，連埋小曾孫Lucas同Quintus就四代同堂，一家人熱熱鬧鬧，可惜謝霆鋒同張栢芝舊年離婚，令美滿家庭留有少少遺憾。
婷婷床邊耳語
謝老太升呢為人瑞，家人接咗佢過四哥胞弟澳洲屋企慶生，四哥同囡囡謝婷婷專程飛過去團聚。婷婷前日仲喺Instagram貼咗同嫲嫲賀壽相，壽星婆換咗件紅衫瞓喺床度休息，背後就掛咗寫上巨型壽字嘅字畫，婷婷不時挨近同嫲嫲傾偈同問好，又嚟個深情一吻，得老人家眉開眼笑。一家人又同嫲嫲開P慶祝，大家仲唱K贈興。
嫲嫲嘅側面同四哥輪廓如同倒模，四哥噚日接受電話訪問就話：「我後生仲似。」問到點樣同媽咪慶賀百歲牛一？佢話：「我買咗個大蛋糕，北京有個書法家仲寫咗大『壽』字畀佢。」美中不足係咪少咗Lucas同Quintus太嫲嫲？四哥話：「等佢哋大個啲先帶埋佢哋嚟。」
講到謝老太長壽秘密，四哥話：「我媽咪有福囉，佢平日好識滋陰。」四哥下月初就76歲，其實佢都成日俾人話保養得宜，眨吓眼四哥好快又變人瑞，佢話：「最緊要好似我阿媽咁精神爽利。」