星期一下午吃過午飯，與中貿林拜拜之後，在商場散步一輪，走落地鐵站想搭車去灣仔行書展。計劃咗成個禮拜，星期一下午有四小時空檔，正好趁書展閉幕前趁吓熱鬧，買番本白先勇寫父親白崇禧，合晒合尺。細路哥時聽父親講民國故事，講到民國將軍，佢最鍾意廣東/東莞人張發奎、薛岳、蔣光鼐、蔡廷楷、余漢謀、香翰屏等等人，但每講到白崇禧、李宗仁，佢就會大罵李宗仁，大讚白崇禧，每每言及：「打日本仔贏幾場大戰，都係我地啲廣東廣西將領帶軍嘅，白崇禧指揮台兒莊大捷，薛岳有長沙大戰，蔡廷楷十九路軍捍衞上海，啲蔣介石愛將，全部江浙系將軍，冚扮爛冇鬼用，蔣介石肯重用白崇禧嘅話，毛澤東死咗好耐……」講到呢度，佢往往會面都紅晒，東莞粗口連珠爆發。當時一家三口住在板間房一張床，包租公日日講解放台灣，十月一日在騎樓掛滿五星旗，十月十日父親就在房內牆頭放置青天白日滿地紅紙旗，返學校有時要聽「個個揸住個兜」，住在石硤尾徙置區嘅姨丈飽讀經書，曾任軍隊軍需後勤，就久唔久叫左丁山信基督教，去教堂領取美國人民捐贈嘅奶粉，此乃左丁山之幼年國民教育。
未識白先勇，已識白崇禧，先父常有「但使龍城飛將在，不教胡馬渡陰山」之嘆。左丁山女兒十七歲時，在密芝根湖畔，讀白先勇小說「寂寞的十七歲」，與「在驀然回首中」，迷上了，猛睇白先勇資料，對白先勇在成功大學水利系考第一名，因興趣不合，轉讀台大外文系，覺得白先勇文理兼備，崇拜到不得了，向左丁山猛講白先勇故事。這也好，父親向左丁山講白崇禧，女兒向自己猛講白先勇，自己聽聽埋埋，可以冒充認識白家兩代逸事。
上車來到灣仔站，已收到短訊，五時後會掛八號風球，於是決定返回中環，執公事包放工好過咯，好彩，書展在下午四時截止售票，準備避風暫休，灣仔之會展─地鐵站行人天橋亂作一團，自己算係避過一場大混亂。白先勇之書，相信中環街市對面三聯書店一定有得賣嘅啫，呢本書一定係中學生之上佳國民教育「延伸閱讀」！