許穎（Phoebe）的寫真集因露點又露股罅，結果被迫退出書展戰場。經淫審處審查後終把她的寫真列為二級，入袋和加警告字條後暫定下周面世。Phoebe得知寫真翻生後即回復寸嘴指不介意定為二級，總好過有人影完又出潔淨版，多此一舉。
今年書展已告一段落，原定推出名為《RealMe》寫真攻書展的許穎，因為寫真中的相片玩露兩點及股罅，雖然已加上後期效果遮掩，但依然露骨意淫，結果被書展方面多番勸喻後，Phoebe的寫真被迫退出戰場，還要第一時間交去淫審處審查。
經過連日來的審核，Phoebe的寫真終於被淫審處列為二級刊物，必須入膠袋及有警告字條才能出售，事件終算告一段落。昨日Phoebe被問到寫真重見天日時，她即表示：「梗係開心喇，咁其實二級都冇乜嘢，最緊要係有結果同初步推出日期。」
自誇原汁原味
回復寸嘴本色的Phoebe狂寸其他模說：「其實二級咪二級，總好過有啲人，影完啲大膽相跟住又話抽起，甚至有啲又話要出潔淨版。家我本寫真原原本本咁推出，先係真材實料同原汁原味，咁先至係真我，RealMe嘛。」為了宣傳寫真，其公司稍後會為Phoebe搞活動及簽名會催谷一下。
另外Phoebe早前接受now102觀星台《雙梁計》梁奕倫及梁榮忠的訪問，梁榮忠問若有電影找她拍全裸鏡頭會否接受？Phoebe堅決表示不會，因為她不會露三點，反而希望把更多時間放在唱歌和藝術工作上。
採訪：丁寧
