夏日求驗客：負美明星隊無所謂
車仔不停改造

車路士繼續喺美國進行熱身賽，禮拜三對住美職聯明星賽臨完場前失守以2:3輸波。喺熱身賽落敗無傷大雅，最緊要都係即將開鑼嘅新一季英超有貨交。講到備戰新球季，車路士真係相當積極，啱啱宣佈落實簽咗巴西未來之星奧斯卡杜斯山度士，繼續車仔中場大改造。
對住有亨利、碧咸同當路雲等美職聯球星壓陣嘅美職聯明星隊，在先開紀錄下喺半場同車路士踢成1:1平手。下半場車路士一度由林柏特建功反超前，但美職聯明星隊先喺73分鐘扳平，去到補時藉一次反擊由艾迪莊遜絕殺贏波。

兩新翼鋒先後亮相

車路士喺過去兩季都被批評陣容平均年齡太大，新球季由少帥迪馬堤奧坐正，佢亦致力着手將隊波年輕化。上季結束後車仔已經簽咗夏薩特同埋馬高馬連，呢兩位翼鋒喺球隊幾場季前熱身賽都有亮相，迪帥似乎都幾睇好佢哋。球會日前仲簽埋夏薩特個細佬杜根夏薩特，不過呢位19歲小朋友，來季就較難喺一隊站得住陣腳嘞。
中場換血嘅步伐冇停落嚟，雖然林柏特啱啱表態話會同球會續約踢到退休，但單靠呢位34歲老將確係唔掂，所以車仔已經喺禮拜三成功簽咗巴西中場奧斯卡杜斯山度士。

奧斯卡落實上車

呢位效力國際體育會嘅20歲中場家正身在英國，代表巴西奧足出戰倫奧，香港嘅球迷都有機會率先睇吓佢有幾多斤両，係咪吹捧到被譽為新卡卡咁犀利。奧斯卡已經喺上星期同車路士做咗體測，為免夜長夢多，車路士豪爽快手落實交易，據講轉會費高達2,500萬鎊（約3億港元）。
車仔重點改造中場，喺夏天連簽幾個新兵之後，我求大俠都覺得一下子煥然一新，確係令人期待。