蘋機會：日系首配四核　相思Phone雨中

十號風球襲港，風雨飄搖下拎部幾千蚊智能手機出嚟，壞機風險仲大過去碼頭睇浪。呢個時候具防水功能嘅Fujitsu手機就幫到你，首度配置嘅四核處理器，Apps齊開都依然暢順，就算風雨下心急打畀另一半關心佢安全、再WhatsApp朋友唱K開枱、住天文台網頁、開Instagram拍颱風另一面，甚至背景播埋MP3，幾操勞都應付裕餘。

記者：陳國輝
攝影：伍慶泉
模特兒：Irene@Zmodel

扮移軸鏡極速對焦

提到Fujitsu手機，焦點總離不開指紋識別功能。無錯，F-10D同樣有呢碟招牌菜，但咪以為有保安功能就夠，原來佢機背位置亦有一枚1,310萬像素鏡頭，唔止解像度拍得住SHARP手機，更有大量影相分唇畀你逐一試玩。其中首度支援兩級HDR功能，等你落到沙灘之後，可因應背光嚴重程度，決定採用邊一級HDR；但叫我最感意外，係F-10D仲追加一項類似移軸鏡嘅玩法，當你將Focus設定於屏幕上任何位置，拍攝後其他地方便會出現模糊效果，用嚟影人、特別係突出人臉表情的話，呢項分唇就特別啱使。

■指紋識別器設於鏡頭以下位置，好就手。

表現拍住遊戲機

F-10D屬日系機中首款四核手機，由啟動相機、對焦到拍攝，過程固然相當之快，但最能體現其高速表現，反而係日常操作上。例如上網時需要放大縮小，或者當背景執行其他程式時，操作反應仍Keep住順暢等，也值得一讚。尤其試玩SEGA招牌作《SonicHD》，主角超音鼠高速喪跑，喺4.6吋芒表現下，無論加速向前俯衝，又或不斷翻觔斗，影像表現都好出色，用嚟打賽車類Game，絕對拍得住真正手提遊戲機。
不過，F-10D唔似得GSIII同LGOptimus4XHD咁，有埋影片Preview或畫中畫功能，但齋以睇片嚟講，畫質、流暢度、屏幕細緻度，表現都不輸呢兩部機王對手。