中國為金牌可謂出盡法寶，食療更加不可缺少；不過為咗應付倫奧安檢，舉重隊決定臨場一邊比賽一邊煲湯，等運動員有新鮮靚湯及方便麪進補，ExCeL體育館隨時滿場香氣。
舉重運動員要挑戰比自己體重多一、兩倍嘅重量，少啲爆發力及能量都唔掂；一般教練都安排大量能量食物，等運動員可以邊比賽邊食，但倫奧為咗場地安全，只限運動員帶不超過100毫升嘅液體入場，如果一早煲定湯帶入場，份量肯定唔夠；中國舉重隊就諗到進補奇招，就係入到場先開始煲湯。
飲雞湯就最好
男隊主教練陳文斌對呢個方法就好贊同，事關舉重比賽前，磅重到正式比賽，都有一段時間；比賽進行中嘅休息時間，選手都係繼續做熱身運動，期間肚空空嘅，就唔太好，但又唔可能食太多，增加體重，所以飲雞湯就最好。
如果要增加口感，仲可以用熱湯煮個麪，真係諗起都流口水，話唔定其他國家嘅選手，都想問中國隊可唔可以分啲畀佢哋。不過話時話，含有瘦肉精嘅豬肉，如果食得多就過唔到藥檢，所以中國隊都係嚴選合格嘅排骨，唔好到時過到安檢，就過唔到藥檢。
王明娟首金保險
中國舉重隊上屆京奧就豪奪8金，威風八面，不過今屆派出6男4女出戰，就叫做以老帶新，除咗男子85公斤京奧金牌陸永再度出師外，其餘都係首度出戰奧運。其中周六首度產生嘅金牌，係女子48公斤，中國就由王明娟出戰；如果射擊隊失手，佢就有希望幫中國奪取首金。女隊教練周繼紅就講，王明娟充滿信心，賽前更喺選手村行街，不過為咗爭取休息，全體舉重隊都唔會出席開幕禮。