好多人手執韓國手機、用韓國化妝品以至追捧韓劇韓文歌，但一聽到韓國車就耍手兼擰頭，試也不試就狠批其工藝差設備渣。與其人云亦云，不如問代理長測幾日一試龍與鳳，結果如何？連阿珠媽都忍唔住對部車直豎拇指！答案唔使多講啦！
記者：李鑒泉
攝影：陳盛臣
模特兒：Raico@In-ModelManagement
煞食揭背車造型
早前兩次試駕現代i40（房車及旅行車版）均被友人同事譏笑「賣車讚車香」。為洗不白之寃，今次問代理借來長測，梗係要四圍去試真啲。揸車當日返公司同事們已嘩聲四起，「睇落唔似韓國車，外形靚仔之餘，仲有LED日光燈，拍得住歐洲車。」皆因這部i40是由現代位於德國的研究中心操刀，車尾線條上揚，猶如近年大熱的揭背房車，加上全車裏裏外外充斥歐洲氣息，連坐慣名車的模特兒也認錯是德國品牌，個樣呃到人。拍攝當日韓國食店街一眾阿珠媽紛紛伸頭探望，雖然雞同鴨講，但她們知道是韓國車後都直豎拇指力撐，買泡菜仲有優惠㖭。
內櫳科幻配備超班
感覺較科幻的中控台雖然美觀，但因按鈕排列與歐日不同，需時適應，較奇怪是SportMode按鈕設在乘客席那邊，使用時不太就手。其餘如支援語音確認的藍芽免提及音響系統、USB及iPhone插頭、電子手掣、自動感應頭燈及軚盤撥片等均提升駕駛樂趣，儘管尺寸達4,740×1,815×1,470mm，但倒後鏡能顯示後泊鏡頭畫面，加埋格線輔助，泊尖沙嘴橫街S位無難度。承托力足的前後座椅不只朋友愛坐，就連最怕坐長途車的父母都大嗌舒服，不過後排中央位置突起，坐起來感覺略帶突兀，為遷就車身造型後座頂部下垂，雖然唔頂頭但空間感較窄，花一萬元加裝全景天幕看來是指定動作。
與外國車廠一車多偈比較，現代i40只得一個版本明顯輸蝕，但這副兩公升直四GDI引擎輸出的177匹馬力，足以推動超高拉力鋼車身，六速自動連+/-波箱反應較預期快。一般行車時，引擎轉數維持在2,000轉左右，轉用SportMode約扯高1,000轉，在起步時感覺較明顯，始終它只是一部房車，已經達標有突。經過三日兩夜測試，以廿幾萬車價就能獲得中高檔房車享受，仲唔係抵食夾大件？
Hyundaii40
引擎：1,999cc直四GDI
馬力：177ps/6,500rpm
扭力：21.7kg-m/4,700rpm
傳動：6前速自動連+/-，前輪驅動
售價：$238,000起（優惠價）
查詢：34288288（HyundaiHK）
後記：心韓韓 食韓菜
今次試韓車，令我心血來潮想食韓菜。香港最正宗食韓菜地點莫過於有「韓國街」之稱的尖沙嘴金巴利街，短短百米已有近廿間韓國餐廳及雜貨舖，大多由韓國人主理，從泡菜、公仔麪到真露應有盡有。食肆外晚晚人頭湧湧，路旁錶位供不應求。提提你，金巴利街左邊約有十個兩小時咪錶，右側部份地段未有劃線，抄牌與否看彩數，附近天文閣旁設收費停車場，每小時26元，要平或要安心均有選擇。
