大整蠱!一心諗住買定飛撐英國奪金希望戴利嘅跳水迷，嚟到呢一刻先發現，由於場館設計上嘅缺陷，手上嘅50英鎊（約600港元）門票，原來淨係睇到跳水選手最後「入水」嗰下動作，想睇晒全套動作咩，竟然要靠場內嘅大電視，真搵笨!
耗資2.68億英鎊（約32億港元）興建嘅倫敦水上中心，係18歲嘅戴利今屆倫奧衝擊金牌嘅表演舞台，英國市民當然一早買定飛支持。但好衰唔衰，原來場館頂部嘅傾斜設計，啱啱好遮晒「山頂位」觀眾嘅視線，尤其係戴利出戰嘅10米高台項目，佢嘅起跳、空翻及旋轉等動作通通睇唔到，望到嘅時候經已係「噗」一聲「入水」嘅時刻!超過600名觀眾受影響，計晒10米台所有男女子個人、雙人及團體項目，更有接近5,000名「受害者」畀錢入場睇大螢幕!
6嚿水只睇到「入水」
負責賣飛嘅倫奧組委自然要出嚟解話，發言人仲死撐：「所有座位都睇到泳池同跳水選手，只有少部份位置係睇唔晒全套動作，不過睇大螢幕一樣精采，一樣咁有氣氛。」由於今次賣飛不設揀位，只係根據不同嘅票價進行抽籤，決定市民嘅「命運」，用6嚿水買咗「山頂位」只睇到「入水」嘅觀眾就一肚氣：「點解開賣嘅時候唔寫清楚呢？又點解嚟到呢刻都仲未有座位表呢？我家終於明白啦!」
另外，喺京奧勇奪7面金牌嘅中國「夢之隊」亦加緊訓練，唔知係咪背負住包攬8金任務嘅關係，壓力太大嘅情況下，連平時甚少發脾氣嘅領隊周繼紅都捉住頭耷耷嘅秦凱訓示：「你以為自己仲細呀？來到呢嗰時候，心態仲未調整好？」但願比賽開始之前，各隊員都將心態同體能調整至最佳狀態。