今夏一直傳利物浦可能賣走安祖卡路爾（圖），但就淨係得個傳字。好似噚日韋斯咸已經正式出價，諗住以先借後買形式簽呢位中鋒，據報轉會費仲高達1,700萬鎊（約2.07億港元），但唔夠24小時，利記已經拒絕咗。另外，紅軍亦繼續增兵計劃，英傳媒爆料，話佢哋打算出2,600萬鎊買畢爾包左閘阿武列比達，唔係啩？又出咁高價買二線球員？