靚女自拍有十式，但自拍影片就唔多人識！皆因易手震兼難收音，結果拍到《死亡習作》咁睇到人頭暈。無私人Cam-man，不妨考慮最新自拍神器Swivl，佢叻在識自轉360°、追住目標喪拍，而且擺定嚟影，更完全毋須理會手震嘅問題，一條友都可拍出精采Video。
撰文：鍾礎鴻
攝影：陳盛臣
模特兒：[email protected]
自轉+上下追影
Swivl飛碟外形係古怪啲，不過真係有料到，功能等同化身360°自動追蹤無線攝錄嘅機械人。佢一盅兩件，底座設有Apple30pin接口，可接駁iPhone、iPad、iPodTouch等iOS設備，另外有個貌似平安鐘嘅Wireless發射器連收音咪，用家戴住佢之後，底座就會變成迷你雷達，左右移動追住你個發射器，按遙控上面錄影掣即可啟動手機專用App嚟拍片。即係無論你點郁，鏡頭都永遠向住你，絕對滿足晒大家上鏡嘅慾望。有效距離達33呎（即10米），亦可遙控調校上10°或下20°視角，跳高擒低都唔怕飛出鏡頭。
相機都用到
除兼容iOS設備外，其他品牌智能手機亦能用於Swivl機座，只要調校基座闊度、扣緊電話後即可手動拍攝。機座底部設有標準嘅相機三腳架螺絲位，駁好腳架後連高度都可以控制埋，拍攝範圍更靈活多變。此外，包裝盒內附送標準相機插座，可以將袋裝數碼相機（重量不超過6安士）安放於Swivl機座進行自拍，不過咁做就需要手動先可攝錄，因為App遙控只支援iOS裝置。
設SportMode加速
模特兒Clarisse用佢自拍咗段一分鐘影片，喺公園就算左跳右跳，都成功被追蹤錄影，而且收音清晰，開埋個App嘅「SportMode」，仲可令機座扭擰加快，就算你自拍踩滑板等快速運動都無問題。最後一提，呢種自拍產品亦適合Blogger以Vblog介紹產品、以及行政人員練習Presentation用，而千零蚊價位，當玩當投資都唔算貴。查詢：StudioA（23694131）
娛樂實用兼備
