家喺伯明翰集訓嘅牙買加倫奧田徑隊，禮拜二作公開練習，但飛人保特就連影都冇埋，搞到一心諗住嚟睇「閃電」嘅觀眾勁冇癮。牙買加方面就強調，保特冇蒲頭唔係因為佢有傷，只係佢選擇閉門練習啫！
牙買加田徑隊上周去到伯明翰大學後，就吩咐保安唔好俾人睇到佢哋嘅運動員練習或者影相，搞到大家怨聲載道。為咗平息民憤，佢哋喺禮拜二搞咗課公開練習，但就唔見保特出現，就連佢嘅勁敵禾漢比歷克都冇現身；喺芸芸有出席嘅運動員中，男子4x100米接力隊成員費達算係最出名嗰個。保特冇蒲頭，外界即刻議論紛紛，估佢係咪傷勢仲未好番；不過，牙買加田徑隊強調保特乜事都冇，只係想同禾漢比歷克齊齊閉關，所以先冇現身。
下月初先現真身
牙買加田徑隊領隊屈斯話：「保特會以最佳狀態出戰奧運。佢喺操練時表現得好好，到咗8月頭，你哋就會見到一個真真正正嘅保特。家大家點講，我哋係唔會理嘅。我相信佢一定冇問題。」伯明翰大學職員亦話見過保特，呢位仁兄咁話：「我見過保特同禾漢比歷克一齊練習，保特仲表現得好有信心，唔似有問題囉。」
得隊友費達撐場
費達亦力撐佢呢位接力隊隊友。佢話：「保特係個大細路，成日同啲隊友開玩笑，佢稱得上係牙買加嘅笑彈。落到跑道佢就好認真，而且實力超強，我當然係唔夠佢跑啦。」至於撐場嘅費達就喺08年京奧、09年同埋舊年大邱世錦賽；同日前話最盡可以喺9秒4完成100米嘅保特，以及其他隊友，合力幫牙買加贏咗3個接力跑冠軍，仲兩次刷新世界紀錄㖭。