據講利物浦打算用1,500萬鎊買斷史雲斯中場祖阿倫嘅合約，呢位正準備踢奧運嘅小將，有望成為今夏第二名加盟紅軍嘅球員。不過好似去年咁，又用貴價簽一大班中型班球員，領隊羅渣士一味靠搵舊部重建利物浦，我求大俠就擔心係咪咁快醫得番。
祖阿倫料倫奧後加盟
雖然仲未證實祖阿倫會正式過檔，但以羅渣士同佢嘅師徒關係，成事機會都好大，睇嚟等佢踢完奧運，就可以落實呢單交易。自從羅渣士上任後，已經三番四次想搵番一班舊部加盟；上季喺白天鵝（史雲斯）打到曉飛嘅基菲爾施古臣，最終甩底去咗熱刺，但好彩早前都喺羅馬簽番曾經係佢一手提拔嘅波連尼。不過，想將自己友搬晒嚟晏菲路，組番隊「羅家軍」，可唔可以喺「大會」利記打番同樣水準，真係打個問號。
大家有眼睇，利記上季開鑼前，都使咗唔少錢買人，佐敦軒達臣、達寧、查理阿當、高亞迪斯、荷西安歷基，大大話話使咗約5,000萬鎊；但呢班來自中型班球會嘅球員，都表現一般。反而免費回巢嘅比拿美，仲俾球迷讚得多。計我話，利記無謂再向細會一班又高價又未證明自己嘅球員埋手，寧願用番呢個價簽一啲打過大會嘅名將仲實際，勿再俾人當水魚！