環球經濟唔好，中港趁火打劫。除咗中海油（883）、中石化爭住去討伐資源，就連成世仔無點做過海外收購嘅煤氣（003）（唔計佢一滴油都未搵到嘅馬達加斯加項目），都無啦啦走去買塊油田。海迪非常懷疑係煤氣自己耳仔軟，被搵生意嘅Banker氹落叠囉！
自稱係「PokerFace」、大家估佢唔到的小超李澤鉅，噚日親自傾掂咗單deal，喺英國（係，又喺英國！）買咗個燃氣項目，和系內三間公司一齊玩，按比例長建（1038）只需要出資23億元。長建過去12個月，已經三次配股集資，截6月底手頭現金有80億元，再加埋呢兩日打算批股籌嘅30億元，現兜兜成110億元喺手，點會只係區區買一個燃氣項目？肯定有大茶飯跟尾。連埋系內公司嘅彈藥，成個英國買起佢都仲得！
海迪
呢單deal化算嗎？海迪認為不盡然。長建N年前喺大陸搞公路，靠嘅就係用平錢買有保證回報嘅項目，但呢條橋喺大陸明顯已經唔啱用，家只係轉個場口喺英國玩。但長建同一年前唔同，家資金成本已經唔平，新買項目ROE只有11%左右，扣扣埋埋，有幾多肉食？海迪認為做長建債仔，好過做佢股東！