左丁山家族第三代今年入大學，高考與文憑試放榜後，三位第三代嘅成績睇表面都有資格入讀中大港大科大（當然不是尖子熱門學系），於是問一位教授：「三大應該揀邊間？」教授問：「住在那裏？」答：「沙田、旺角！」教授話：「三大無乜分別，而宿舍同樣短缺，應該就近搭火車入讀中大啦，費事舟車勞頓，搭成個鐘頭車去港大。」想落又係，希望佢地順利獲得中大取錄啦。
既然學生豪爆出冷門，考到中游成績，左丁山為佢高興，特登向「喜萬年」訂咗一隻燒乳豬到佢屋企吃晚飯，為佢慶祝，喜萬年乳豬真係掂，係拿手好戲，人人吃過讚好。問豪仔入讀幼稚園之前，有冇拜過文武廟，佢話：「我點知呀，冇記憶，要問阿爸！」豪爸爸話：「我有帶豪仔同佢阿哥去拜文武廟㗎，你教㗎嗎！」豪仔阿哥已在中大畢業，今年攞埋碩士再得短期獎學金去美國參加國際領袖訓練班，豪仔而今有可能入埋中大，豪爸爸飲得杯落。
拜文武廟並非導人迷信，只因左丁山先父入學前已由阿嫲帶往荷李活道參拜，左丁山未入學，盲字唔識一個之前，先父又帶左丁山去文武廟跪拜，摸吓文昌帝君枝筆，於是到左丁山仔女入學前，亦帶佢地去拜一拜，僥倖至今一家五口有六個碩士學位，憑學位脫離貧窮，諗起細路哥時之每日到麥花臣球場之臭公廁之苦況，算係咁咯，要有一點感恩之心。
講讀書，就唔夠吳嵩醒咯，中學時佢係聖保羅男女中學合唱團成員，攞過幾次校際朗誦冠軍先至到澳洲讀大學，吳嵩來短訊澄清：「當年在新南威爾斯大學讀嘅係商學碩士（MComm），唔係MBA，又當年嘅澳洲ASA已改名為AICPA。」吳嵩之留學澳洲，有家族原因，並非如電視台女記者所講：「一啲學生作最壞打算！」到海外讀書，當然並非最壞打算，唔信就問吓啲高官，點解佢地啲仔女個個去英國讀書？文憑試放榜後，一位家長朋友來電詢問升學之事，講講吓佢大罵教育局高官不知本地家長之苦，因為啲高官子女入晒國際學校，例如謝凌潔貞D8常秘，自然缺乏本地教育之親身經驗，左丁山唔識為佢地辯護，只好講一句：「新科教育局長吳克儉個仔係在本地中學畢業嘅！」