今年係三三四學制第一屆中學文憑試，英制高考試最後一屆，八間受政府資助嘅院校分兩批收生，高考生之大學名額一萬四千五百個，入大學讀三年，文憑試學生之大學學額同樣有一萬四千五百個，學生入大學要讀四年，二○一五年五月之後，所有經高考入大學之三年制大學生畢晒業，三年制大學在香港正式成為歷史，香港教育制度卒之向英國殖民地制度告別。
因為文憑試係第一屆，放榜後所有家長與應試學生拿着成績單都忙作一團，八百二十七名尖子（考獲五科5*以上）或者係例外，佢地已經霸晒醫科、法律、環球商業、計量金融、精算、藥劑、翻譯、心理學、會計系、新聞系嘅大部份學位。其他人呢？考獲最低入學標準之33222者有二萬六千四百人，共有起碼一萬二千人左右入唔到八間大學，唯有申請海外、本地私立大學、社區學院……
放榜後，好多親戚以為左丁山係專家，紛紛打電話嚟問，個個問文憑試考5級與高考成績點樣比較？其實文憑試與高考試嘅課程完全不同，大學收生嚴格區分兩者，不能混淆，故此蘋果好難同橙比較，文憑試係中學高中畢業程度；高考係接近大學一年級課程程度，點比較呀？不過既然係第一年，大學收生當然亦係摸着石頭過河，盡量收晒啲44444成績嘅學生嘅啦（即中英數通識四科加一科選修，全部4級），呢類成績學生有一萬二千四百人，理論上可以全部入晒八間大學。左丁山俾人問到口啞，先至醒起家族之中有一人考高考，二人考文憑試，急忙打電話去問清楚。學生豪呢隻頑皮仔，幾年前叫佢寫篇五十字短文都寫唔出，今年考成點呢？好驚噃，好彩，學生豪都識得爆吓冷門，以上述方法計算，係445*35，為之喜出望外，學生豪話：「唔駛去英國咯！」呢啲成績當然入唔到英國top10嘅，好多英國大學窮到燶，教員士氣低落，去唔去都罷啦。不過留學外國多年之肥仔K聽電視台記者報導：「一啲學生作最壞打算，申請去外國……」為之把幾火，佢話：「留學點解係最壞打算，女記者好似唔識用字！」