耶魯大學由校長至教授，經常掛在嘴邊嘅就係criticalthinking（批判性思考），但在新加坡與新加坡國立大學（NUS）合作興辦一間Yale-NUSCollege，究竟為乜，耶魯校董會與耶魯校長冇講清楚，尤其是在新書院，學生不能搞政治性抗議活動，就引發耶魯大學教授嘅抗議，其中一位政治系講師及著名專欄作家/評論員JimSleeper，係耶魯校友及哈佛博士，太太係耶魯政治科學講座教授，發表咗一篇長文"YaleHasGonetoSingapore,ButCanItComeBack"（讀到左丁山索氣）上網一查即有，痛批耶魯在新加坡辦學，真係可以作為「國民教育」參考文章，讓學生明白何謂文明、有深度嘅深層次辯論，為何言論自由係文明人文明社會之基石，認識一個國家，認同一個國家，因而真正愛國，係要辯論後，全民達成共識，共同維護核心價值（言論自由、維護異見者權利、人權）先至得嘅，愛國流於口號化、公式化，就唔係真愛國。唔好以為美國人成日嘈喧巴閉，罵總統聲音不絕，民主共和兩黨狗咬狗骨，但國家一旦有事（例如九一一），全美國人民就自動團結在佢地平時睇唔起嘅小布殊總統周圍，向國旗致敬，一致抗敵。未入過大學嘅勒邦占士，平時好似過份個人主義，為爭奪NBA錦標，就摒棄家鄉球隊（克里夫蘭），投奔米亞密熱火隊，俾俄亥俄州人罵得要死。上星期美國奧林匹克籃球隊與巴西隊作熱身賽，奧巴馬總統夫婦與大女兒入場（副總統貝登陪同）睇波，勒邦占士對記者說：「小時候發夢打NBA，發夢代表美國隊。但今日見總統親自到場睇我地比賽，好令我謙卑。」嗱，平時鬧還鬧，美國人見到總統親臨，還是相當尊敬的，這就是美國國民教育之成功。
真正之國民教育不來自課堂，而來自人民有思考自由，言論自由，痛批政府之自由，以及政黨交替執政之民主選舉制度。在學校讀甚麼教科書，其實冇乜所謂，左丁山兒童時就被左派學校學童包圍，佢地連入去域多利戲院睇西片都驚俾學校老師見到，但長大之後，佢地人人成為走資派，摒棄了毛澤東，因為社會對佢地嘅影響遠遠超過學校對佢地嘅思想教育！