蘋機會:陳冠希回歸行蠱惑 收你皮!

蘋機會:陳冠希回歸行蠱惑 收你皮!

估唔到快將推出的《SleepingDogs》都抄《無間道》橋,講卧底探員沈偉,如何混入黑幫偵查。遊戲以香港作舞台,充斥大量廣東話同粗口,最過癮係扮過少年劉健明嘅陳冠希,客串聲演蠱惑仔Jackie,聽番久違嘅聲音,真係有股莫名親切感。

記者:許福合
攝影:陳盛臣
模特兒:Mandy@PureModels

鬼佬講廣東粗口

這款《SleepingDogs》八月才推出,因玩法極似《GTA》,加上以香港做背景,故試玩版剛曝光已吸引唔少香港機迷。最近更公佈由陳冠希聲演JackieMa一角,加上亞洲演員胡凱麗、荷李活的劉玉玲、TomWilkinson及EmmaStone等,配音陣容絕對重量級!遊戲雖以英文進行,不過故事發生在香港,所以角色間中會爆幾句廣東話,甚至粗口,甚麼「趕住投胎呀?」、「X你!」、「收你皮!」等滿場飛,唔知以為LMF同黃秋生走入咗隻Game度。稍彈一下係略嫌陳冠希以外嘅廣東話配音唔夠地道,一聽就知係鬼佬學講廣東話,而且字幕以英文顯示,角色講廣東話甚至粗口都會轉為英文,最常見是「Fxxking」,呢啲繙譯當然無晒廣東話粗口神髓啦!

■陳冠希聲演JackieMa一角,展現口技。

■將人推入高溫火爐,真係乾手淨腳。

■由唐樓天台望一堆中文招牌,好有親切感。

■女角似越南大家姐,多過似港人囉。

■陳冠希聲演的角色,紋身勁搶眼。

■陳冠希用英文講解大佬同細佬含意。

■在香港狹窄街道上喪衝,好刺激。

血漿大平賣

遊戲內角色大多佈滿紋身,龍哥虎哥的生活自然不平凡,除咗大街同人開片外,隨住任務進行,更要經常打交解決問題,由赤手空拳到動刀動槍,打到血濺都係小意思,最變態係可利用身邊環境作兇器,好似推人落巨型抽氣扇葉、高溫火爐等,非常暴力血腥,難怪被定為18禁,《GTA》都要行埋一便!
既然故事在港發生,熟悉街景梗唔少得,最常見係砵蘭街一帶的舊樓等場景,加埋街邊中文招牌,港人玩真係好有Feel。除街頭毆鬥,仲有好多唔同玩法,好似非法賽車、鬥雞賭錢、唱K放鬆吓,玩法仲雜過日本黑幫Game《人中之龍》,值得期待。

■間中仲會使出吳宇森式的慢動作槍戰。

《SleepingDogs》

機種:PS3、Xbox360
類型:動作冒險
人數:1人
推出:8月14日
售價:$388