一位老外朋友愛食黑朱古力，話對心臟血管有益咁講，朱古力自可可豆提煉，如此說來，不如直接飲可可（舊式茶餐廳叫谷古），但現在香港比較少見可可飲品，凍朱古力奶，熱朱古力就大把。據網上資料，一位哈佛醫學院教授觀察巴拿馬人飲料，發覺巴拿馬人喜愛飲可可，一個星期飲成40杯，同時發現只有10%巴拿馬人患上四大疾病，即中風、心臟停頓、癌症與糖尿。飲可可係唔係咁有用呀？或者係信者得救。不過見到老外B食朱古力多年，人雖然肥少少，但佢話自己好健康噃。
食黑朱古力是否真的有效？歐洲食物安全局在七月十七日表示同意朱古力廠商BarryCallebaut提交之食物數據，指一種cocoaflavanols物質係可以降低血壓，增進血液流通，如明年歐盟批准，呢間廠可以將佢生產含有cocoaflavanols嘅產品列為健康食品。老外B話：「呢，食黑朱古力就得㗎嘞，我食最黑嗰隻。」左丁山半信半疑，但自己都幾喜歡食朱古力嘅，於是跟佢去買咗兩盒最黑嘅（含85%可可），其實內裏是否含有cocoaflavanols，睇標籤睇唔到，或者要等到明年呢間BarryCallebaut先至肯向其他生產商發售佢地研發出嚟嘅生產方程式，正式顯示CF含量。
老外B話：「講你又唔信，索性去飲熱朱古力啦，擺花街有間專門店，啲熱朱古力好好飲！」於是同佢走去呢間Jean-PaulHévin買咗一杯，嘩，真係血液加快流通嘞，未飲已經面色漲紅，一杯細細嘅熱朱古力，竟然係五十八蚊一杯，話係純朱古力粉加奶不加糖嘅喎！呢間朱古力專門店以擺花街為旗艦店，另有分店在國金商場，其他商店設在巴黎、東京、大阪、福岡、廣島、上海、台北，幾識賺有錢亞洲城市嘅生意。五十八元一杯？點可以每星期效法巴拿馬人飲四十杯呀，咪講笑！老外B話：「呢啲昂貴歐洲式飲品，現在只可以在亞洲生存嘅啫，我上個月去西班牙搵一位舊朋友食飯，佢死都唔肯出街，後來我話明由我請客，佢先至肯陪我去到一間餐館，內外坐滿遊客，生意好好，但我位朋友入到去第一件事，竟然係問人地請唔請parttime，佢願意做侍應！我覺得心有不忍，好彩我老早移民香港啫！我間公司想請人都請唔到呀！」