奧運未開幕，不過南韓人氣泳手朴泰桓已經輸咗，仲要輸畀南韓花樣滑冰女神金妍兒？其實朴泰桓輸嘅係人氣，南韓傳媒報道，由92巴塞隆拿奧運開始，金妍兒成為接拍廣告最多嘅南韓運動員，比排第2嘅朴泰桓多93個廣告。
21歲嘅金妍兒2010年冬奧奪金，加上樣貌標緻，當然成為大型企業嘅最新寵兒，三星、Nike、現代等廣告一浪接一浪。據廣告公司InnoceanWorldwide統計，金妍兒至今已足足接拍咗136個廣告，估計以佢現時嘅人氣，一個廣告代言費為8至10億韓圜（約540至670萬港元），金小姐收入真係和味。
廣告收入不及金妍兒
南韓泳手朴泰桓，亦都拍咗43個廣告，好似之前拍三星手機、大韓航空等廣告，亦都幾受歡迎；朴泰桓位列南韓體育界第2位，但都輸畀金妍兒一條街，或者倫奧再攞多次金牌，就有希望追近啲。
之前去法國集訓嘅朴泰桓，上周六抵達倫敦，周日早上立即到奧林匹克水上運動中心練水，經過一小時熱身，就練水約20個塘：練水後朴泰桓就講：「場館水深3米，而且很乾淨，不過因為自己剛到埗，身體有啲唔適應，希望盡快回升狀態。」朴泰桓會參戰200、400同15,00米自由泳，其中衞冕400米嘅對手就係中國嘅孫楊。